Jounen jodi vandredi 20 janvye 2023 a, responsab pati Rasanbleman Demokratik Nasyonal Pwogresis (RDNP) ak militan politik la, Mirlande Manigat, te chwazi reyaji sou patisipasyon li anndan Wo Konsèy Tranzisyon (HCT) aprè chwa gouvènman Ariel Henry an.
Selon sa manm Wo Konsèy Tranzisyon an Mirlande H. Manigat fè konnen, li pa rive nan laj pou l ta fè tèt li ilizyon, pou l ta gen anbisyon ekstrawòdinè.
«Mwen fè apèl avèk rezon epi sans patriyotik pou m antre ladan li, tout moun wè kijan bagay la ye epi viktim tou.»
Fenomèn ensekirite a pa sispann kreye panik anndan peyi a, kote prèske tout moun ta viktim, selon madanm Mirlande H. Manigat, antanke fanm ak moun ki rete laplèn li ta viktim tou. « Sa fè kèk tan m ap sikile, sa fè konbyen tan m pa te ka sòti, men m fè plis pase 2 mwa m paka al nan inivèsite. Anplis, tout bagay ap vin chè anndan peyi an. Etan done, karyè m ak konpetans mwen, gen yon bagay nou kapab fè, patikilyèman nou 3 anndan Wo Konsèy Tranzisyon an.»
Pouvwa anplas la te chwazi mete kanpe yon Wo Konsèy Tranzisyon (HCT) nan dat 21 desanm 2022 a, kote li chwazi 3 kategori moun sa yo : Laurent Saint Cyr, Calixte Fleuridor epi Mirlande Hyppolite Manigat.
Pandanstan, desizyon chwazi antre nan Wo Konsèy Tranzisyon an pa fè tout moun plezi anndan sosyete a, kote Mèt Bernard Gousse te di :« Li mèt vòlè jan l vle, li mèt touye jan l vle, pèsonn paka revoke gouvènman an, pa gen demokrasi san kontwòl. Si w ekri gwo atik epi gwo liv, men pou w Dakò w al sèvi briganday sa, ou pa demokrat epi ou pa konstitisyonalis vre.»
Selon gouvènman defakto Ariel Henry, li mete kanpe Wo Konsèy Tranzisyon (HCT) apati 3 sektè : Ekonomik, Sosyal epi Politik. Anplis, ki pral gen pou misyon òganize yon eleksyon transparan, remaniman ministeryèl epi refòm diplomatik.
Selon madanm Mirlande Hyppolite Manigat :« Pral gen yon refòm nan administasyon piblik an jeneral, k ap kòmanse nan Konsèy minis pou rive sou direktè yo tou, elatriye.»
Paralèlman, youn nan objektif pouvwa anplas la se rive òganize yon konsansis Nasyonal epi yon Tranzisyon tout moun ladan li, pou ka gen yon bon jan eleksyon. Mirlande Hyppolite Manigat di « Se pa yon sipra ekstrikti, KEP egziste nan konstisyon an, n ap vize sak pou fòme Konsèy Elektoral epi remaniman konstisyonèl la.»
Refòm konstisyonèl ki te prevwa fèt sou ansyen prezidan Jovenel Moïse la, gouvènman aktyèl la vle kontinye pwosesis la nan lide pou abouti avèk objektif sa. Selon konstitisyonalis Mirlande Hyppolite Manigat « si nou vle yon refòm konstisyonèl kounya, fòk nou mete yon vas antrepriz, yon refòm konstisyonèl, nou pa bezwen envante puiske gen anpil moun k ap travay sou li deja. Refòm lan ka pran plizyè fòm epi sou divès fòm.»
Ariel Henry pa gen twò lontan li pibliye arete kote li ofisyalize chwa sila sa yo nan Wo konsèy Tranzisyon an, sak ta pèmèt li aji sou ansanm mannèv politik li.
« Mwen pa al pote soutyen m bay pouvwa, se yon bann kritik enjis, mwen pa al pote aktif ni pasif pou gouvènman an. Nou pa al fè yon pouvwa paralèl, men pito ede peyi a. Mezanmi, ba nou yon ti chans pou n kòmanse travay», se deklarasyon militan politik Mirlande Hyppolite Manigat.
N ap raple sekretè Jeneral Rasanbleman Demokratik Nasyonal Pwogresis (RDNP), Éric Jean Baptiste, te mouri sou gouvènman Ariel Henry, akoz ensekirite nan peyi a nan lannuit 28 oktòb 2022, nan Laboul 12.
Atik sa se pwopriyete prive ©️ Gwoup Medya MAGHAITI 2023
