Aprè tout konsta ki fèt nan antrepriz k ap produi sik nan Repiblik Dominiken, Etazini mande pou yo pran responsablite yo pou frennen zak vyolasyon dwa travayè yo patikilyèman travayè Ayisyen yo ap sibi. Nan deklarasyon sou sekretè adjwen travay pou zafè entènasyonal la, Thea Lee fè li soulinye antrepriz sa yo prije timoun yo nan fè travay fòse.
“Depi 2009, endistri sikriyè dominiken an sou lis pou zafè problèm travay timoun yo ki nan fè travay fòse. Se yon problèm nan tout endistri a“, se deklarasyon Lee fè sou dosye sa a.
Nan menm sans sa, responsab la fè konnen avètisman sa konsène tout antrepriz sik yo, kote li di Etazini vle kontinye tanmen diskisyon ak sendika travayè yo, gouvènman dominiken an epi ak antrepriz yo pou chache jwenn bon jan solisyon.
“Pi gwo pwoblèm lan se sitiyasyon travayè Ayisyen yo, kit yo te migran oubyen desandan Ayisyen nan Repiblik dominiken, yo sibi abi responsab antrepriz yo, akòz yo pa vle rekonèt yo ni pitit yo tankou sitwayen dominiken paske yo manke dokiman legal yo”, toujou daprè sa responsab la fè konnen.
Pandantan sa, gouvènman ameriken an deside envesti 3 milyon dola nan antrepriz sa yo nan yon projè yo fè pou rezoud problèm sila ki egziste depi lontan nan sistèm sikriyè dominiken an. Objektif projè sa a, se bay travayè yo lanmen ak tout fanmi yo epi pèmèt tou dwa sitwayen yo kapab respekte.
Atik sa se pwopriyete prive ©️ Gwoup Medya MAGHAITI 2023
