Nan yon kominike Direksyon Jeneral Migrasyon (DGM) sòti jodi mèkredi 18 janvye 2023 a, yo fè konnen yo rive depòte anviwon 8 977 migran san papye. Daprè presizyon yo bay, pifò nan sitwayen sa yo se Ayisyen yo rapatriye pandan 2 semenn mwa janvye a.
“Sòti 2 pou rive 15 mwa janvye a, gen 8977 etranje ki te nan prizon epi rapatriye yo. Pifò nan yo se Ayisyen ki nan sitiyasyon migratwa iregilye nan peyi a, sa ki bay rezilta sa yo pou operasyon ki mennen chak jou yo” se sa yo fè konnen nan kominike sila.
Pandantan sa, direktè migrasyon dominiken an, Venancio Alcàntara pwomèt pou kontinye ak politik migratwa a, nan sousi pou frennen migrasyon iregilye nan Repiblik Dominiken.
Se poutèt sa, yo soulinye gen mezi ki pran pou fè fas kare avèk tout moun ki ilegal nan peyi yo a, tankou: kreyasyon ekip entèdiksyon migrasyon ki la pou mennen operasyon depòtasyon an nan tèt kole ak lame epi lapolis dominiken. Responsab la soulinye yo deja aranje yo pou mennen epi ogmante operasyon nan tout peyi a pou depòte tout etranje iregilye.
Atik sa se pwopriyete prive ©️ Gwoup Medya MAGHAITI 2023
