Nan yon operasyon fòs lòd Meksiken yo mennen ayè lendi 16 janvye 2023 a, yo rive anpeche 250 Ayisyen vann nan espas piblik yo. Daprè deklarasyon sekretè sèvis piblik nan Tapachula, José Arturo Rojas, komèsan yo pa kenbe lari yo pwòp, selon Listín Diario.
“Kèk moun te okipe wout sa yo nan yon kontèks kote gen anpil moun k ap vire tanzantan epi lari yo sal, se chèche n ap chèche repran espas piblik yo, nou konnen son w koze ki konplike, retire moun nan plas yo egziste epi l ap kontinye fèt chak jou, pou n kòmanse pran kontwòl la“, se sa sekretè sèvis piblik la te deklare.
Nan menm kad dosye sa a, responsab la fè konnen gen gwo chita pale ki te fèt ant migran yo ak Komisyon Nasyonal Dwa Moun yo(CNDH) epi ak divès sekretè nan meri vil Tapachula a. Daprè detay li bay sou desizyon ki pran, tout migran sa yo ki t ap vann sou wout yo, ki gen ladan l anviwon 250 komèsan ayisyen, pral jwenn yon kote pou yon ti tan pou yo ka vann zafè yo.
Pou kounya otorite meksiken yo ap deplase komèsan Ayisyen sa yo nan “Tianguis Centro“, kote ki gen 100 plas ki deja disponib pou sitwayen sa yo kontinye vann pou yon ti tan.
N ap raple gouvènman Meksiken an dakò pou resevwa anviwon 30 000 migran chak mwa, si sa ta rive tout kondisyon nouvo aplikasyon lalwa prezidan Joe Biden mete sou pye a pa respekte pou moun sa yo antre Etazini. Pandantan sa, pou lane 2021 an, Meksik te anrejistre 131 448 pou sila ki mande azil yo.
Credit photo: www.npr.org
Atik sa se pwopriyete prive ©️ Gwoup Medya MAGHAITI 2023
