Pòtoprens, jou dimanch 27 novanm 2022. Aprè peyi Kanada ak Lèzetazini te deside sanksyone ansyen senatè Youri Latortue ak prezidan ti rès sena a Joseph Lambert, kòmkwa yo ta nan aktivite kriminèl tankou vann dwòg epi finansye bandi nan peyi a, ebyen peyi Kanada poukò l mete sou lis nwa ansyen prezidan Michel Joseph Martelly, ansyen premye minis Laurent Salvador Lamothe ak ansyen premye minis Jean Henry Céant. Peyi Justin Trudeau a di: « li gen ase prèv nan men l pou li pwouve politisyen sa yo nan gwo konplo ak bandi k ap teworize popilasyon an.»
Gen lòt politisyen ki sou lis sanksyon kanada, tankou ansyen depite Garry Bodeau, ak lòt ansyen palmantè tankou Rony Célestin epi Hervé Fourcand. Gen anpil lòt gwo chabrak peyi Etazini koupe viza yo, men selon politik peyi a sa yo pa devwale non moun yo sanksyone yo. Gen anpil fo lis k ap sikile pasi pala sou rezo sosyal yo, gen anpil move nouvèl tou, anpil atak pèsonèl, anpil moun tou pwofite regle koze pa yo tou nan sans sa. Men sa ki pi enpòtan, mas yo kòmanse tonbe!
Nou pa vin jwe wòl avoka okenn politisyen nan dosye sa, paske lè mesyedam sa yo te konn ap boule lajan peyi a mal, nou pa te janm patisipe ak yo, nou pa te janm konn al lonje bòl ble nou devan yo, ni fè pwomosyon pou 25 estad foutbòl ki envizib yo. Depi lontan viktim yo ap denonse move zak politisyen sa yo, men lajistis ak enstans ki la pou batay kont koripsyon te toujou chwazi kase fèy pou kouvri sa.
N ap raple nou yon ansyen direktè jeneral OAVCT ki te rele Edrick Léandre, te akize ansyen senatè Youri Latortue andirèk sou Radyo Karayib FM kòm moun ki te nan dosye vòlè machin nan peyi a. Li te menm akize senatè a kòm moun ki te fè konplo pou fè l pase 4 tran ak 8 mwa nan prizon akoz dosye sa. Men, lajistis ayisyen pa te janm leve ti dwèt li pou fè limyè sou akizasyon sa yo jiskaske Edrick Léandre vin rive mouri anba kowona.
Akizasyon yo anpil sou do Youri Latortue, Joseph Lambert ak Hervé Fourcand kòm moun k ap itilize lajan dwòg ak lajan koripsyon pou finansye aktivite politik yo. Moun sa yo gen anpil pouvwa sou teritwa y ap dirije yo, tankou depatman sid, sidès epi Latibonit. Yo gen pouvwa pou yo nome epi revoke moun yo vle nan tout bwat leta yo, yo gen anpil enfliyans ak anpil zèl kat nan men yo. Nou paka ni konfime ni demanti akizasyon yo paske nou pa lajistis, se pa dwa nou, men nou tout konnen kijan lajistis pa bò isit fonksyone deja (paswa).
Men si n ap byen reflechi, nan ki peyi serye pou yo ta sanksyone yon prezidan sena ki ta nan aktivite dwòg ak zak kriminèl pou l pa ta demisyone tousuit? Kit se vre kit se pa vre? Malerezman ti nèg isit pa negosye pouvwa yo, pito yo lèd yo la. Se modèl dirijan sa yo ki reprezante nou, se modèl zannimo politik sa yo, restavèk blan je vèt ki toujou ap pran desizyon pou nou, paske moun serye pè fè politik nan ti peyi sa.
Nou pa bezwen revelasyon Lambert yo ankò, li twò ta, yo p ap itil nou anyen ! Lè bèchon jwaye a nou pa te la, nou p ap la tou nan bay lapire a!
Men sa maryonèt politik sa yo pa konprann, loksidan pa gen zanmi, loksidan ap toujou defann enterè li. Okontrè blan yo renmen lè men dirijan yo pa pwòp, yon fason depi yo pa vle suiv lòd yo ankò y ap mete tout vye dosye yo deyò. Ebyen se sa k ap pase la, koz loksidan deside kraze klas politik sa paske li pa itil yo anyen ankò.
Pou dosye mesyedam Tèt Kale yo nou p ap mize sou sa, paske se pa jodi a n ap denonse rejim sa ki kontinye a ak move pratik Lavalas la nan distribiye zam nan geto yo pou konsève pouvwa. Depi 30 an politisyen sa yo ap manipile jèn yo nan geto yo, yo pa bay yo aksè pou y al lekòl ni posiblite pou yo travay men yo pito ba yo zouti pou youn touye lòt.
Jodi a nou p ap etone si peyi Kanada deside mete sou lis nwa ansyen prezidan Michel Joseph Martelly, ansanm ak 2 ansyen premye minis Tèt Kale ki se Laurant Lamorthe ak Jean Henry Céant. Martelly ak Lamothe te toujou idantifye tèt yo kòm “Bandi Legal”, kòmkwa yo gen lajan ak pouvwa, yo ka fè sa yo vle nan peyi a. Men pou ka ansyen premye minis Jean Henry Céant an, non li toujou ap site nan dosye volè kay ak tè malere yo.
Aprè gwo akizasyon sa yo, gen ti gwoup ki kanpe pirèd pase avoka pou defann moun sa yo kòmkwa se loksidan k ap fè akizasyon san yo pa gen prèv. Kesyon pou yo poze tèt yo, kisa lajistis peyi nou an t ap regle pandan 30 dènye ane sa yo ki fè prezime bandi ak dilè dwòg jwenn plas yo nan palè nasyonal, laprimati ak palman an? Kijan fè te gen tout akizasyon sa yo epi pa te janm gen yon ankèt serye ki louvri? Kijan fè Joseph Lambert toujou nan tèt sena a aprè tout sanksyon sa yo li pa demisyone?
Men, se pa sèl politisye yo ki mete peyi a la. Gen moun ki nan sektè biznis lan sa nou rele boujwa yo ki nan tout move tranzaksyon pou yo ka fè degouden.
Jou ki te vandredi 25 novanm 2022 a, lapolis nasyonal te rive arete antreprenè Joël Khawly nan depatman Sidès epi sezi 2 zam lagè fizi Smith epi Wesson modèl MEP15, ak 2 chajè ki gen 47 katouch. PNH la te jwenn tou yon ouzi ak 2 chajè ak 52 katouch, yon 9 milimèt ak yon chajè ki gen 14 katouch ak yon lòt ki gen 16 katouch. Sa pa fini la, kay antreprenè a te genyen 3 bonbonn gaz lakrimojèn, ak 2 bwat katouch 12 ki gen 42 katouch antou. Se pou l bay kote li achte tout materyèl sa yo!
Nan eleksyon 2015-2016 yo, non biznisman Joël Khawly te site anpil kòm moun ki t ap fè dezòd epi finansye bandi pou pran kontwòl vòt yo nan depatman sidès. Men, lajistis te kase fèy kouvri sa. Se moun tankou moun ki gen lajan paka nan move zafè! Gen anpil biznisman ki nan fè dezòd nan peyi a epi non yo ap site nan tout move dosye.
Nou toujou ap tann sa lapolis ak lajistis ap di nan dosye batay ki nan Laboul 12 ant biznisman ki rele Toto a ki mèt Toto Bòlèt ak gang Ti Makak la. Anpil moun gentan tonbe nan gè sa, pami yo 2 moun yo te idantifye kòm jounalis ak lidè RDNP a kise Eric Jean Baptiste. Menm jan ak Lasalin, Ba Dèlma, Matisan, Tòsèl, Gran Ravin elatriye… Laboul 12 tounen yon zòn nondwa. Nou rete kwè se pa sèl gwo zòn sa k ap tonbe anba kontwòl bandi; machin blende, gwo barye, al pran pwen kay djab p ap regle anyen pou moun ki gen lajan. Fòk yo envesti nan sosyal, batay kont lamizè epi patisipe nan avansman peyi a sinon konsekans yo se nou tout k ap sibi yo.
Pou kounya, pèp la pèdi tout volonte pou li pran lari pou denonse move jesyon gouvènman defakto a ak lamizè. Nou nan peryòd boul, pandan popilasyon an ap amize l, Ariel Henry ak rès entèlektyèl pakoti yo ap fè plan pou yo kenbe pouvwa a pou kèk mwa ankò.
Dayè si pèp la ka bouche nen l li bwè pri gaz la, pa gen anyen li p ap aksepte. Popilasyon an toujou gen distraksyon sou rezo sosyal pou detounen atansyon li sou sa ki esansyèl yo: lè se pa yon Daniel k ap mache sou moun, se Johane k ap fè koze nan Doubay, oubyen dosye Truck Driver k ap fè fanm Etazini goumen ak fanm Sendomeng. Travay mantal la ap byen fèt epi machan mikwo ap byen manipile lòt moun k ap suiv yo.
Konplo a pa piti!
Atik sa se pwopriyete prive ©️ Gwoup Medya MAGHAITI 2022
