Nan yon adrès ak nasyon an ayè mèkredi 5 oktòb 2022 a, premye minis defakto Ariel Henry, mande kominote entènasyonal la pote li sekou. Konsa kriz ki genyen yo ap rezoud epi anpeche plis moun mouri daprè sa chèf gouvèneman an fè konnen.
“M ap mande èd akonpayman ak sekou, nou bezwen yo ba nou tout kalite sipò nesesè” se sa doktè a mande tout kominote entènasyonal la ak tout peyi zanmi Ayiti yo, nan adrès pou nasyon sila a.
Chèf gouvènman an te kontinye pou l di: “Moun pral mouri pa pil ak pa pakèt si entènasyonal la pa fè anyen ak kriz imanitè sa a k ap bwase bil pèp la.” Se nan sans sa a li mande popilasyon an pou li ouvri je li.
Nan yon lòtbò, premye minis defakto Ariel Henry ta vle pou entènasyonal la vin rezoud tou pwoblèm kriz gaz la pwovoke nan peyi a, daprè sa li di nan adrès ak nasyon li an. Pami pwoblèm sa yo nou ka site: lopital yo ki fèmen, konpayi dlo trete ki sispann fonksyone, tèminal vare gang G9 an fanmi e alye kanpe an kwa pou gaz la pa pase, lekòl ki poko ka louvri, bank yo ki oblije fonksyone pandan 3 jou sèlman nan yon semèn, lamizè li menm k ap taye banda sou pèp la, ensekirite, kolera ki tounen nan peyi a, pou n site sa yo sèlman.
“An nou pran desten nou an men” se mesaj sa chèf gouvènman an vle fè rive nan zòrèy chak grenn ayisyen ki sou ti bout tè a ak sila yo ki deyò peyi a.
Anplis, premye minis lan mande pou popilasyon an montre konpasyon yo epi leve eskanp figi peyi a pandan li di: “An n met tèt nou ansanm pou Ayiti, Ayiti paka peri, Ayiti p ap peri“.
Nan adrès pou nasyon sa tou, chèf gouvènman an pa te kache pou l mande tout Ayisyen ki gen bon volonte pou yo kanpe mobilize kont tout “zòt” ki mete pèp la ajenou ki panse se sèl wout pou ba yo pouvwa.” Doktè a pa bliye di tou : “Grenn bandi sa yo, se ak kèk move politisyen epi kèk move nonm dafè yo asosye pou lage peyi a nan katchaboumbe“.
Se pou sa li mande pèp la pou l pa rete gade sitiyasyon sa a konsa.
Premye minis lan toujou rete nan lide dyalòg la. Se pou sa li fè konprann , li konnen tout kalvè pèp la ap monte ak pri pwodui yo epi tout sa k ap pase nan peyi a depi 3 semenn. Se poutèt sa tou li mande: “Pèp la pou li kale je l pou konprann moun ki dèyè sitiyasyon malouk sa a.”
Ariel deklare: “Chodyè a pa ka toujou ap bouyi yon sèl bò.” alòske jiskounya sèl sibvansyon gaz la ti pèp la te benefisye nan men leta a koupe.
Nan kesyon chèf gouvènman an t ap poze pou konnen èske nèg ak zam yo se nan enterè pèp la yo bloke gaz la, ta sanble ni nèg ak zam fanfwa yo ni leta p ap travay nan enterè pèp la.
N ap raple premye minis lan se chèf Konsèy Siperyè Polis Nasyonal (CSPN), kote li rive ap plenyen kou wè tout moun akoz nèg ak zam okipe espas estokaj tèminal vare.
Tout deklarasyon premye minis lan fè nan ti pale li te ak nasyon an ayè mèkredi 5 oktòb la, montre “tout bagay pa sou kontwòl vre“, jan minis afè etranje a, Jean Victor Généus te fè mesaj la pase devan konsèy sekirite Òganizasyon Nasyonzini “ONU” an.
Atik sa se pwopriyete prive ©️ Gwoup Medya MAGHAITI 2022
