Ayè jedi 22 Septanm 2022 a, nan lannuit, François Fortuné alyas “ti nonm” ki se ti frè lejand Léonor Fortuné(Azor), rive mouri nan yon lopital nan Pòtoprens, akoz maladi ren. Se 2 pitit li yo ki pataje enfòmasyon an sou Radyo Karayib (Jounal Premye Okazyon).
François Fortuné alyas ti nonm mouri ak laj 59 an, li te chantè, konpozitè epi pèkisyonis anndan gwoup « Racine Mapou», li t ap kolabore avèk frè li «Azor», ki te mouri nan dat 26 Jiyè 2011.
François Fortuné «Ti nonm» mouri kite 12 pitit, anplis youn ladan y ap viv nan peyi Etazini, selon enfòmasyon Youn nan pitit li yo te bay sou radyo Karayib la. Yo tou pwofite mande Enstans konsène yo pou yo kolabore avèk yo nan objektif pou yo ka ofri li yon antèman ki diy, parapò avèk tout sakrifis li te fè pou kilti Ayisyen an.
N ap raple atis François Fortuné alyas “Ti nonm” te soufri maladi ren, nan dat 20 Septanm 2022, yo te mande ak Leta ayisyen sipò pou renouvle paspò li jis pou li te kapab al pran swen lòtbò dlo.
Crédit: Haiti24
Atik sa se pwopriyete prive ©️ Gwoup Medya MAGHAITI 2022
