Jounen jodi vandredi 23 septanm 2022 a, komisè gouvènman an Mèt Jacques Lafontant mete manda dèyè prezidan konsèy pèmanan legliz Episkopal Dayiti a, Jean Madoche Vil akoz akizasyon Trafik zam ak minisyon ilegal nan Ladwann Pòtoprens.
Legliz Episkopal Dayiti, katolik aglikan lan gen kèk mwa non l ap site nan koze ki dwòl pa bò isit, kote plizyè nan manm li yo deja anba men Lapolis aprè yo te fin sezi yon konntenè zam ak minisyon ilegal nan ladwann Pòtoprens lan. Pami non sila sa yo genyen : Gina Rolls (Komisyonè), Lovenie Louis (Kontab legliz Episkopal Dayiti), Jean Gilles Jean Mary epi pè Frantz Cole.
Toujou nan kad dosye sa, Lapolis te rive chèche Direktè Lekòl “Collège Saint-Pierre” ki se pè Fritz Désiré, men li te gentan chape poul li nan dat 24 Dawout 2022, anndan lokal lekòl sa.
N ap raple yo te dekouvri konntenè zam ak minisyon ilegal sa yo nan non Legliz Episkopal Dayiti nan dat 14 Jiyè 2022, kote ladan li, yo te jwenn 22 zam plizyè kalib, 19 fizi, 140 chajè avèk diferan kalib, 14600 katouch, elatriye.
Atik sa se pwopriyete prive ©️ Gwoup Medya MAGHAITI 2022
