Miche-Herly Tania Pierre fè Arete Sylvio Lesperance ki se papa mari li, doktè Odilet Lesperance ki te mouri 29 dawout 2022, anndan lopital Saint- Thérèse nan vil Miragwann akoz yon kansè nan sèvo.
Daprè sa radyo kiskeya fè konnen, madanm doktè akize papa mari li, paske fanmi an te vin chèche mari li malgre yo te konnen li te malad, pou li se yon zak kidnapin ki merite jije devan lajistis.
Jonel Lesperance ki se frè defen an te fè konnen bò kote pa li, fanmi Lesperance te deside pran doktè a nan men madanm li Tania poutèt li pa te sansib pou maladi mari li.
Pou kounya Sylvio Lesperance ki genyen 85 lane ki se papa doktè a ki te mouri a , twouve li nan gadavi Aken pandan lajistis ap kontinye fè travay li.
N ap raple doktè Odilet se te manm RHJS( Reseau Haïtien des Journalistes de la Santé). Li te yon gwo jinekològ obstetrisyen ki te konn bay sèvis nan yon klinik li te posede nan Ribenn.
Atik sa se pwopriyete prive ©️ Gwoup Medya MAGHAITI 2022
