Nan yon sikilè Rektora Invèsite Piblik Nò nan Okap an Ayiti (UPNCH) te sòti nan dat Jedi 29 Jiyè 2022, inivèsite a di li aksepte pou etidyan li yo soutni memwa yo nan lang matènèl yo (Kreyòl Ayisyen ).
Yon desizyon ki vin aprè konsiltasyon konsèy la, kote Rektora te rive enfòme kominote inivèsite a sa, keseswa pwofesè, etidyan epi lòt anplwaye yo sa.
Anplis, tout etidyan ki fin suiv kou teyorik ak pratik yo nan inivèsite a avèk yon akò direktè memwa ka chwazi ekri oubyen prepare memwa li epi soutni memwa li devan yon jiri an kreyòl, ki se youn nan 2 Lang yo.
Tout etidyan ki chwazi travay memwa li nan lang kreyòl, l ap jwenn yon akonpayman lenguistik espesyal ak yon komisyon revizyon ki kreye pou sa, yon fason pou inivèsite a ka asire kritè egzijans akademik lan respekte.
Rektora deside pou li òganize kèk konferans ak fowòm syantifik nan Lang kreyòl, kote se responsab nan Akademi Kreyòl Ayisyen (AKA) an ki pral gen pou konferansye yo.
Batay pou ofri plis plas ak retire konplèks nan ekri ak pale kreyòl la ap kontinye selon volonte anpil moun ak enstitisyon.
Atik sa se pwopriyete prive ©️ Gwoup Medya MAGHAITI 2022
