Port-au-Prince, le 24 Septembre 2019._ À un carrefour où la corruption, le désordre, le désespoir et l’effritement des valeurs semblent se noyer dans un océan de confusion, le spécialiste en science du Développement lanse un appel aux haïtiens de tous les coins du monde les invitant à garder l’espoir de voir une meilleure Haïti dans les jours qui viennent.
Aux jeunes comme au vieux, le natif de la commune d’Anse-Rouge parle en ces termes:
Kri kè mwen!
Ayisyen an Ayiti!
Ayisyen tout kote!
Sitiyasyon n’ap viv jodia se yon sitiyasyon espesyal. Nou tout dakò ke nou rive deja twò lwen nan lese ale sa a. Enstitisyon nou yo pagen valè ankò e nou pèdi tout mounite nou.
Nou kite lè a bwè nou. Sak plis di a, nou kontinye ap fouye tèt nou nan kabouyay. Bagay yo tout koulè devan zye nou. Bouch nou pale tout koze jodijou, zòrèy nou tande tout koze. Nou pa pè anyen ankò, menm tèt nou. Nap envante pwòp sivilizasyon pa nou.
Sak dwe pran nou la a ? Sak ta di sa?
Ayisyen an Ayiti!
Ayisyen tout kote!
Kat la te bat kont nou deja. Pou sa mwen wè ki fèt deja pou disparèt nou, gade nou la toujou.
Pandan aktè yo ap kontinye travay pou elimine nou, jèn kou vye, piti kou gran, mwen vle di nou KENBEFÈM.
Kelkeswa sak gen pou fèt ankò pou mennen n plis ba pase kote n ye laa, nou dwe KENBEFÈM.
Pa kite evènman yo pote nou ale.
Gen bon jan lespwa ke Ayiti paka peri.
Sitiyasyon an malouk anpil. Aktè yo pèdi kontwol tout bagay. Donk, pagen youn nan aktè ki la yo nou ka konte sou yo nan moman sa a.
Poutan, ap gen yon solisyon kan menm paske NOU SE AYITI e AYITI se REZILYANS!
Mwen vin di nou KENBEFÈM, paske n’ap vanse pi pre fen rèy aktè ki la yo: 3 pouvwa yo, lopozisyon an ak sektè prive a. Se yo menm ki trennen nou kote nou ye la a e nou pa dwe fèmen zye nou sou sa.
Jèn kou Vye, piti kou gran, KENBEFÈM.
Sonje: lè li pi fè nwa, se jou li pral fè jou. Toujou fè saw kapab pou w pwoteje tèt ou ak tout sa ki antoure ou nan moman difisil sa yo. Li preske fè jou.
KENBEFÈM!
KRI KÈ MWEN.
Bendy Génestant, sitwayen!
