Nan yon seremoni ki fèt nan sine Triyonf jou ki te vandredi 5 oktòb 2018 lan, AKA lanse « Mwa lang ak Kilti Kreyòl» an Ayiti. Yon mwa aktivite ki ap kòmanse jou ki 5 oktòb lan pou rive jis 28 oktòb, pou make jounen entènasyonal lang ak Kilti Kreyòl. Aktivite yo ap gen pou fèt anba tèm : «Tankou tout lang, Kreyòl gen règ li, an nou respekte yo».
«Kreyòl lan se yon lang tankou tout lang, Fòk nou ekri l byen epi respekte tout règ li yo », se ak mo sa yo chantè BIC, mèt seremoni an, te kòmanse sware an. Annapre, gwoup Twoubadou KOLESERE ak Teyat Nasyonal ta pral ofri kèk dans nan stil yanvalou ak kongo, 2 varyasyon kilti Kreyòl lan.
Anpil ofisyèl pat rive patisipe nan sware akoz gwo lapli ki tap tonbe sou Pòtoprens. Yo te voye reprezantan yo kanmenm. AKA te pwofite onore kèk pèsonalite ak enstitisyon ki fè vi yo ap bay lang kreyòl lan jarèt. Radyo tele Ginen, Jounal Bon Nouvèl epi Sosyete Animasyon ak Kominikasyon Sosyal (SAKS) te jwenn omaj ak rekonesans pou travay yo reyalize pou lang lan.
Frankétienne, gwo potorik gason sa ki manyen divès chan atistik (pwezi, woman, teyat, chan, penti) te resevwa yon plak donè nan men AKA. « Se premye fwa yo onore m nan peyi epi se pou lang mwen ankò» sa se pawòl Frankétienne, Mapou literè an, ki pat kache lakontantman l.
Selebrasyon Lang kreyòl, lang tout ayisyen, oblije AKA mete yon seri aktivite sou pye yon fason pou envite piblik lan konprann ideyoloji yo. Se pou sa pandan mwa sa ap gen yon pakèt aktivite tankou Mardi kreyol nan DNL, atelye deba, nan plizyè Sant kiltirèl pou selebre Lang ak kilti kreyol. Anplis de sa, akasemisyen ayisen yo annonse aktivite yo pral bout nan Gonaives jou kap 28 oktob la avek patisipasyon chantez Émeline Michel pou rann omaj ak Maurice Sixto.
© Tous droits réservés – Groupe MagHaiti 2018
