Nan yon rapò yo pibliye ayè lendi 8 desanm 2025 lan, Inite Lit Kont Koripsyon (ULCC) fè konnen ansyen prezidan Michel Joseph Martelly te bay manti sou kantite byen li te genyen avan ak pandan l te prezidan. Pou sa li te deklare yo, ajan yo fè konnen gen gwo enkoyerans ladan yo puiske gen byen li te genyen avan l prezidan li pa t mete lè l ap antre, men li mete yo lè l t ap sòti. Yo soulinye you li fè deklarasyon sòti yo 2 lane aprè l te kite pouvwa a.
« Nou mande pou lajistis arete Michel Joseph Martelly pou fo deklarasyon patrimwàn », se sa nou li nan rapò 12 paj sa ULCC pwodui a. Yo fè konnen rezon yo se paske yo wè gen nan deklarasyon l yo ki enkonplè, genyen ki fo, gen enkonyerans epi yo fèt ta, sa ki vle di yo lakòz pa gen transparans ak moralite administratif.
Pou sa ki gen pou wè ak kont bankè, ULCC fè konnen ansyen prezidan an te di l gen 4 kont bankè DAT dola, tandiske yo jwenn li genyen 12 kont bankè endividyèl ak enstitisyonèl ki te fonksyonèl depi lè l t ap antre an fonksyon an an me 2011. Pou sa l te deklare l genyen nan Capital Bank lan, anketè yo di yo pa jwenn li. Anplis sa, yo fè konprann lè l ap sòti li te fè kwè l genyen 6 kont poutan yo jwenn li te gen 17 kont aktif ak 3 kat kredi ki sou non li menm ak madanm li, Sophia Saint-Rémy Martelly.
Pou fason li te konn fè lajan, li te deklare yo lye ak zafè atistik li ki gen lwe aparèy ladan l, konferans li konn bay, ak lajan fanmi li. Poutan ajan yo jwenn gen gwo enkoyerans nan chif yo. Pa egzanp : li te di l ap touche 242 400 goud, li fè 100 000 dola vèt nan lwe aparèy ak zafè atistik prive l. Alòske pi devan li te evalye pa ane li fè 181 000 dola vèt san bay pyès eksplikasyon. Se menm bagay la tou pou madanm li puiske li te di li fè 60 mil dola vèt alòske pi ba li te di fè 348 mil dola san eksplikasyon. Mete sou sa, li pa t deklare tou lajan li te konn touche antanke konseye prezidan an, alòske sòti me 2011 rive fevriye 2016 li te toujou konn touche lajan sa a.
Lajan l fè nan zafè atistik ak antanke konferansye rive bay 370 400 dola ameriken. Ki evalye ak 270% lajan li te deklare li te konn fè a. Pandantan sa yo soulinye menmsi prezidan an te atis, men li pa t janm pefòme pandan manda li a.
Pou kay li genyen, li te di li genyen 4, men lè l ap sòti li te deklare l gen 6. Nan 6 sa li gen youn li te gen deja li pa mete, poutan li ajoute lòt li te gen deja genyen pandan l pa t mansyone yo avan sa. Pou zafè machin, li te deklare l genyen 2. Men, ULCC eksplike Ofis Asirans Machin Kont Tye (OAVCT) te di li pa gen machin ki sou non Martelly men pito sou non madanm li. E pou antrepriz li yo, ògànis la fè konprann li pa t fè okenn deklarasyon men yo jwenn li gen rapò ak M6 Consult S.A, Global Voice Group S.A, Transcomeau S.A, ak Edet S.A.
Atik sa se pwopriyete prive ©️ Gwoup Medya MAGHAITI 2025
