Nan yon rapò Òganizasyon Mondyal Sante (OMS) pibliye jodi vandredi 31 me 2024 la, OMS fè konnen timoun yo pran tabak plis pase granmoun yo, se pou sa yo leve vwa yo byen wo pou defann ka jèn k ap konsome tabak yo, epi mande pou gouvènman yo jere dosye sa. Yo fè sa nan kad jounen mondyal “sans tabac” la k ap selebre jodi a.
«Li mande gouvènman yo pou pwoteje yo kont endistri tabak ak nikotin», se sa yo ekri nan rapò a. Anplis, yo estime gen 37 milyon timoun ki gen laj 13 ak 15 an k ap itilize tabak ak nikotin nan anpil peyi. E yo fè konnen timoun yo konsome sigarèt plis pase granmoun yo.
Pou rejyon Amerik la, genyen 5.4% nan adolesan yo ki sèvi ak sigarèt elektwonik (Chicha ak lòt ankò). Poutan gen 6% lòt ki sèvi ak sigarèt konvansyonèl yo( sa tout moun konnen sou non mantole a).
«N ap pale apati moun ki poko gen 15 lane, kidonk chif sa a ta dwe zewo», selon medsen Jarbas Barbosa, ki se direktè Òganizasyon Panameriken Sante (OPS).
Pi devan yo di : «N ap rejwenn ansanm avèk jèn yo nan ankouraje tout Eta Manm OPS yo pou yo adopte yon apwòch konplè pou mennen yon lit kont tabak ak pasyon pou nikotin, pou kontrekare taktik pwopagasyon endistri yo», se sa espesyalis la defann.
Òganizasyon Mondyal Sante kontinye pou li kritike konpòtman endistri yo genyen pa rapò ak pwodui y ap distribiye bay timoun yo nan divès fason tankou sirèt ak frui. Rechèch ki fèt Etazini montre, plis pase 70% konsomatè sigarèt yo te kapab kite fimen, men se sèlman si pwodui yo te disponib sèlman nan gou tabak.
Men sa Direktè Depatman Pwomosyon Sante OMS la, medsen Ruediger Krech deklare : «Endistri sa yo fè eksprè nan chanje konsepsyon pwodui yo epi sèvi ak estrateji maketing ki atire timoun yo dirèkteman. Yo itilize gou timoun yo abitye deja tankou sirèt koton ak chiklèt, konbine avèk desen ti tonton, kolore ki sanble ak jwèt, se yon tantativ flagran pou fè adolesan yo dejwe ak pwodui danjere sa yo».
Responsab la ajoute «Taktik twonpri sa yo mete aksan sou bezwen ijan nou genyen pou pwoteje adolesan yo kont pwodui sa ki ka dejwe epi frajilize yo pou tout lavi yo».
Pou fini, òganizasyon ki nan domèn sante a, mande gouvènman yo pou yo pwoteje timoun yo pou yo sispann fimen tabak, sigarèt elektwonik epi lòt pwodui nikotin yo. Selon yo menm, leta dwe fè sa pou n ka gen yon anviwonman san lafimen tabak.
Atik sa se pwopriyete prive ©️ Gwoup Medya MAGHAITI 2024
