Enstitisyon Lapolis la ap konnen divès pwoblèm menm jan ak lòt enstitisyon nan peyi a. Se pou sa a, selon konseye Sendika Polis Nasyonal d Ayiti-17 (SPNH-17), Garry Jean-Baptiste, pou rezoud kriz ensekirite a, yo dwe abòde l sou 3 pwen. Premye bagay la daprè li se revokasyon wo kòmandan Lapolis la ak lòt pèsonaj nan tèt enstitisyon sa a.
«Jodi a li endispansab pou nou rive gen yon plan sekirite. Li dwe vini parapò ak yon “vetting“, fòk gen yon komisyon ekspè ki fè yon “vetting” anndan lapolis la, fòk yo revoke direktè jeneral Frantz Elbé ak tout lòt direktè depatmantal ki patisipe nan kraze Lapolis la», se pawòl sa yo Garry Jean-Baptiste deklare jounen madi 28 me 2024 la nan Radyo Televizyon Karayib ( RTVC).
Sendikalis la di li rete kwè, tout fòs etranje k ap vini la kit se fòs miltinasyonal ak lòt li dwe vini pou ranfòse Lapolis la ak sila yo ki nan lame yo osnon li p ap bay okenn rezilta.
Pandan fòs miltinasyonal sipò ak sekirite a pa kapab janm ka vini pou ede Lapolis la fè fas kare ak bandi yo, gwoup gang “Viv Ansanm” nan li menm pa sispann simen latwoublay nan peyi a. Touye moun chak jou, boule blennde, kraze komisarya, piye epi kraze byen piblik ak prive moun se divès zak endividi sa yo kontinye ap fè.
Pou Garry Jean-Baptiste, yo dwe abòde kesyon sekirite a nan 3 nivo: Yon plan sekirite anlè (Aérien), yon plan sekirite terès pou kontwole fwontyè yo ak ayewopò a epi yon plan sekirite maritim.
Pou fini, n ap fè konnen konseye prezidansyèl tranzisyon an, Leslie Voltaire demanti enfòmasyon ki fè kwè 2 000 polisye Ayisyen gen pou al pran 2 semèn fòmasyon Kenya. Daprè Voltaire, sa a medya “Kenyans.co.ke” te di a pa t janm sa yo te mete yo dakò ak responsab lapolis kenyan yo.
Atik sa se pwopriyete prive ©️ Gwoup Medya MAGHAITI 2024
