Kèk tan aprè lapolis te anonse li reprann kontwòl komisarya Gresye a, bandi ak zam mete dife nan yon machin blennde yo jodi lendi 27 me 2024 la. Nan divès videyo k ap sikile sou rezo sosyo yo, nèg ak zam yo montre yon lòt fwa ankò yo ap kontinye boule materyèl fòs lòd yo.
«M te di yo m ap boule l», se pami divès pawòl endividi ak zam yo deklare nan videyo yo pataje a. Yo montre tou yon timoun ki nan gang ki patisipe li menm tou nan boule materyèl lapolis la. Aksyon sa pase nan zòn Kolonbye, espesyalman bò lekòl «Centre d’Études Classiques Émile Durkheim/CECED», ki chita kò li nan Gresye.
Pou kounye a, poko gen pyès detay sou polisye ki te nan cha sa a. Men, selon sa plizyè sitwayen nan zòn touprè yo fè konnen se ta pyèj endividi yo te tann pou ajan lapolis yo.
N ap fè konnen mwa desanm 2023 a, endividi ak zam te mete dife nan yon cha enstitisyon an nan zòn Maryani. Yon materyèl ki pa te pran tan pou ajan yo te reprann l epi etèn dife a ladan l. N ap soulinye, pandan atak sa pa t gen okenn polisye nan machin blende a ki te viktim, puiske yo te gentan sove lavi yo.
Atik sa se pwopriyete prive ©️ Gwoup Medya MAGHAITI 2024
