Nan yon atik jounal Kenyans.co.ke ekri jodi lendi 27 me 2024 la, yo anonse gen 2 000 polisye Ayisyen k ap gen pou ale pran 2 semèn fòmasyon nan peyi Kenya. Se yon desizyon ki pran, selon yo menm nan yon akò Konsèy Prezidansyèl Tranzisyon(KPT) an siyen nan tèt kole ak gwoup polisye kenyan yo ki te vin nan peyi a pou voye je sou avansman travay yo.
«Gwo tèt nan ekip polis Kenya a ki apèn retounen yo, te mete yo dakò sou yon akò yo siyen ak konsèy prezidansyèl tranzisyon Ayisyen an pou fasilite fòmasyon an, nan lide pou ede sòlda k ap konbat gang yo ki kontwole 80% peyi a”, daprè sa jounal afriken an revele.
Pilwen, yo soulinye fòmasyon sa ajan Polis Nasyonal Ayiti (PNH) yo pral gen pou suiv la, se ap yon “fòmasyon akselere“. Menmsi yo pa bay dat polisye sa yo ap gen pou kite peyi a, men yo mansyone seyans fòmasyon yo ta dwe fèt pandan 2 semèn aprè sa ajan sa yo ta dwe antre an Ayiti nan mitan mwa jen an.
N ap soulinye pou sa ki gen rapò ak deplwayman fòs etranje a, responsab yo nan peyi afriken sa te mete l pou yon lòt dat. Puiske, daprè sa plizyè jounal afriken rapòte, te gen reta nan materyèl ki te dwe achte yo. Anplis, konstriksyon baz fòs la ki poko janm fini.
«M kwè pwofesyonèl sekirite nou yo gen eksperyans ak konesans nesesè sou tout sa ki dwe fèt yo», se deklarasyon Prezidan kenyan an, William Ruto nan BBC News kèk tan aprè yo te anile vini fòs etranje a, ki te dwe fèt depi 23 me 2024 la.
Atik sa se pwopriyete prive ©️ Gwoup Medya MAGHAITI 2024
