Nan yon kominike pou laprès Ofis Pwoteksyon Sivil (OPC) mete deyò, samdi 25 me 2024 la, kote li eksprime anpil regrè ak endinyasyon sou zak asasinay 2 misyonè Ameriken epi yon Ayisyen ki se : Davy Lloyd, Natalie Lloyd epi Jude Monti. Zak sa a te fèt nan dat 23 me ki sot pase a nan lokalite Lizon (Laplèn).
Fas ak deteryorasyon nivo ensekirite a an Ayiti, nou mande chanje wo kòmandman Polis Nasyonal d Ayiti epi pou etabli yon konsèy Sekirite Nasyonal (CNS) nan tèt peyi a.
Ofis Pwoteksyon Sivil fè konnen depi aprè nominasyon obsèvatè yo ak enstalasyon Konsèy Prezidansyèl Tranzisyon (KPT) an nan dat 25 avril 2024 la ki gen pou prensipal misyon asire gouvènans leta atravè yon akò politik. Anplis, frennen zak kriminèl k ap fèt fasil yo, rekanpe otorite leta ak enspire yon lòt chanjman nan peyi a.
«Poutan, nan menm moman an dwa sitwayen yo kontinye ap vyole pi plis toujou anba men bandi ak zam san fwa ni lwa yo», se sa ki ekri nan kominike pou laprès sa a.
Selon done ki disponib yo, OPC rakonte gen plis pase 30 komisarya ak sou komisarya bandi ak zam piye epi mete dife ladan yo ki fè pati kowalisyon gwoup gang VIV ANSANM.
Paralèman, OPC fè kwè evenman yo depase dirijan ki nan enstitisyon lapolis la epi yo afiche yo montre yo enkapab pou frennen zak banditis yo nan peyi a. Anpil analis ak defansè dwa moun yo denonse konplisite ki egziste ant polisye yo ak kriminèl k ap opere nan vil yo akoz prezans enpinite a.
Yon lòt kote, li envite KPT pou li evalye dimansyon sitiyasyon sekirite a nan peyi a epi pou li jwe tout wòl li nan retabli sekirite sou tout tèritwa nasyonal la sitou atravè Misyon Miltinasyonal ak Sipò pou Sekirite nan aplikasyon Konsèy Nasyonal Sekirite a.
Pou fini, OPC egzije plizyè chanjman nan nivo wo kòmandman Lapolis la, ki se yon kondisyon inevitab pou yo ka derasinen gang yo nan peyi a.
Atik sa se pwopriyete prive ©️ Gwoup Medya MAGHAITI 2024
