Pierre Michel Chéry ki se manm fondatè Akademi Kreyòl Ayisyen (AKA) rann dènye souf li jodi samdi 25 me 2024 la. Dwayen Fakilte Lengwistik Aplike (FLA) a, Renauld Govain, anonse nouvèl lanmò womansye a nan yon pòs li fè sou kont fesbouk li.
«Mwen fèk aprann lengwis akademisyen Pierre-Michel Chéry (Pimich) kite nou. Mwen prezante Akademi Kreyòl ayisyen an, tout akademisyen yo, fanmi li kondoleyans nan non pa mwen e nan non Fakilte Lengwistik Aplike», daprè sa nimewo 1 fakilte lengwistik la anonse.
Pierre Michel Chéry ki te fèt nan lane 1956 te nonsèlman manm fondatè AKA, men tou li te yon lengwis ki fè pati divès òganis tankou Rezo Kreyolis Ayisyen (REKA) ak International Organisation of Creole People (IOCP). Mete sou sa a, li te yon enfòmatisyen, li te gen yon metriz nan Teknoloji Enfòmasyon e li te yon womansye.
Nan mitan maton lang an Ayiti yo, yo te konnen l sou non “Pimich” kòm yon pèsonaj ki te toujou ap milite pou lang kreyòl la. Se pou sa a dwayen FLA a nan lide pou rann li omaj deklare : «Pimich ofri nou yon eritaj literè konsekan pou nou byen jere nan respè kontribisyon pèsonèl li nan vansman lang kreyòl ayisyen an. AKA pèdi yon manm ki rann kreyòl la anpil sèvis! Se pou nanm li repoze an pè».
“Move nouvèl pou fanmi zanmi ak tout Kreyolis yo”., “Bon vwayaj Pimich“, se divès reyaksyon aprè nouvèl lanmò akademisyen a jodi samdi a.
N ap soulinye, Pierre Michel Chéry se otè plizyè liv tankou Eritye Vilokan ki te pibliye nan lane 2001, Bèbè Golgota an 2008,
Senfoni nago nan lane 2012 ak Pèleren nan lane 2015.
Atik sa se pwopriyete prive ©️ Gwoup Medya MAGHAITI 2024
