Anbasad Etazini an Ayiti eksprime sipò l ak tout atant li, jounen jodi vandredi 24 me 2024 la, konsènan pwosesis pou dezinye yon nouvo premye minis nan Konsèy Prezidansyèl Tranzisyon an nan peyi a, selon deklarasyon biwo kominikasyon l pibliye sou kont X li.
Peyi Etazini ensiste sou enpòtans yon pwosesis transparan ak san paspouki nan chwa premye minis ak gouvènman an. Pandan yo espere chwa a pral fèt sou baz merit ak teknik san patipri.
«Nou akeyi enfòmasyon Konsèy Prezidansyèl Tranzisyon Ayisyen an te kòmanse nan pwosesis pou fè chwa yon premye minis epi nou espere sa a ret transparan, sa a ki pral pèmèt Ayiti gen yon PM ak yon gouvènman tranzisyon yo chwazi sou baz merit ak teknik epi san patipri », se sa a Anbasad la fè konnen atravè yon nòt pou laprès.
N ap soulinye, yon manm nan Konsèy Prezidansyèl Tranzisyon an (KPT), Augustin Smith, te fè konnen ayè jedi 23 me a, non premye minis dezinyen an dwe sòti nan wikenn lan oswa lendi k ap vini la, gen 10 nan yo ki kenbe sou 69 pami dènye patisipan yo.
N ap tou pwofite raple, yon depite Ameriken nan eta Missouri pèdi pitit fi l ak bofi li ki se te 2 moun k ap jere yon misyon an Ayiti ki gen ladan l 450 timoun. Nan atak sa a bandi ak zam asasinen yo aprè yo te fin bwote tout sa ki te nan kay yo.
«Kè mwen kase an mil moso, mwen pa janm santi kalte doulè sa a. Mwen swete yo tou 2 ale nan paradi.» selon piblikasyon depite Ameriken Ben Baker sou paj Fezbouk li aprè zak asasinay sa a.
Atik sa se pwopriyete prive ©️ Gwoup Medya MAGHAITI 2024
