Bandi ak zam nan laplèn touye, jedi 24 me 2024 la, 2 misyonè Ameriken ak 1 Ayisyen, nan lokalite Lizon aprè yo te fin pran yo nan yon anbiskad.
Nouvèl trajik sa a te frape fanmi reprezantan eta Missouri a Ben Baker ki se depite nan eta Ameriken an. Bandi ak zam an Ayiti touye pitit fi l ak bofi li ki te 2 misyonè nan peyi isit la.
«Non viktim yo se Natalie Lloyd, Davy Lloyd epi Jude Lloyd ki se Ayisyen an», selon sa Mission In Haïti rapòte sou paj Facebook li.
Misyonè sa yo se responsab misyon ki pote non «House of Compassion» ki twouve kò li nan lokalite Lizon. Anplis, misyon sa a ofri plizyè sèvis tankou ede moun ak ofri ti moun moso edikasyon puiske yo gen legliz ak lekòl ladan li tou.
Bandi ak zam ta pral atake yo nan lannuit mèkredi 22 me ki sot pase a pandan yo t ap sòti nan legliz misyon an, yo te nan machin avèk pitit yo. Bandi sa yo te pran yo nan yon anbiskad epi mennen yo lakay yo pou yo piye tout sa yo te jwenn nan kay la.
«Davy ak Natalie Lloyd te sibi atak sa a byen bonè epi gwoup gang sa te touye yo nan lannuit mèkredi pou rive jedi nan maten», daprè sa a depite Ameriken an fè konnen se 3 kamyon ki te pran yo nan anbiskad nan zòn lizon.
Anplis, depite a ajoute yo te bat Davy Lloyd epi maltrete l pou l te ka mennen yo nan kay la, malgre li te pran lapriyè akoz sitiyasyon an te dezespere. Li soulinye, li te rele otorite lokal yo men li pa te ka jwenn yo.
N ap raple bandi ak zam ki fè pati gwoup gang 400 mawozo yo te deja kidnape yon Youtoubè Ameriken ak yon Ayisyen nan dat 29 mas ki sot pase la pandan li te vin fè entèvyou ak chèf gang Babekyou. Addison Pierre Maalouf ak kameraman li te jwenn liberasyon yo nan dat 30 mas 2024 la yo menm.
Atik sa se pwopriyete prive ©️ Gwoup Medya MAGHAITI 2024
