Nan yon kominike pou laprès, Konsèy Nasyonal Telekominikasyon (CONATEL) mande konpayi DIGICEL pou li respekte sikilè 31 me 2022 a ki gen pou wè ak ajisteman tarif yo, jodi mèkredi 22 me 2024 la.
«CONATEL mande DIGICEL pou li aplike sikilè 31 me 2022 nan tout rigè l sitou nan chanjman tarif epi rewè evalyasyon ak mezi ki pa konfòm yo, selon atik 1 nan sikilè a. Tout kreyasyon ak modifikasyon tarif sèvis kominikasyon dwe pase devan CONATEL nan yon delè 8 jou anvan li aplike», se sa a Konsèy Nasyonal Telekominikasyon an ekri nan nòt sa a.
Konpayi a pa sispann ogmante pri sèvis kominikasyon li yo, malgre move kalite rezo li yo, kat yo k ap gaspiye pandan dènyè jou sa yo ak lòt difikilte moun ap konnen. Sitiyasyon sa a lakoz anpil moun ap plenyen, se sa a nou te ka konstate sou rezo sosyal yo. Konsèy Nasyonal Telekominikasyon (CONATEL) fè konpayi a konnen depi li pa respekte prensip yo, l ap resevwa penalite.
Pou fini n ap raple direktè jeneral CONATEL la, Joses Jean-Baptiste, te rankontre nan dat 17 me 2024 la ak direktè Jean Philippe Brun, pou trete kesyon modifikasyon pri sèvis telekominikasyon l ap plede ogmante sou konsomatè yo.
Atik sa se pwopriyete prive ©️ Gwoup Medya MAGHAITI 2024
