Aprè ansyen chèf palè Nasyonal Dimitri Herard te sove kite penitansye nasyonal aprè gwoup gang «Viv Ansanm» te fin kase l nan dat 2 avril 2024 la, ansyen chèf palè Nasyonal la sou prezidans Jovenel Moïse la se konseye aktyèl gwoup gang 5 Segond lan ki chita kò l nan Vilaj Dedye, selon sa a jounal New York Times rapòte jounen jodi madi 21 me 2024 la.
New York Times Kontinye pou eksplike, ansyen chèf Inite Sekirite Jeneral Palè Nasyonal (USGPN) lan, Dimitri Herard, se konseye ak òganizatè gang 5 segond lan. Yo di tou, wòl li se etabli rapò ant divès òganizasyon kriminèl nan rejyon an, patikilyèman katèl dwòg, se sa a yon wo responsab nan rejyon an ak 2 lòt diplomat oksidantal fè konnen.
Anplis, gwoup gang an Ayiti yo sanble ap itilize divès zam katèl gang kolonbyen « Gulf clan» k ap opere nan Karayib la ta vann yo epi itilize peyi vwazen li pou yo vann kokayin.
« Prezidan kolonbyen Gustavo Petro te deklare mwa dènyè, yo te vòlè plizyè zam militè epi vann ak gwoup lame epi katèl, presizeman an Ayiti », se sa a jounal ameriken ajoute.
Pou fini, New York Times di ansyen polisye Dimitri Herard te deja pami youn nan sispè yo nan kad yon dosye enpòtan ki te gen pou wè avèk dwòg an Ayiti. Nan lane 2015, yo te kanpe kagezon « MV Manzanares » avèk plis pase 1000 kilo kokayin ak Ewoyin ladan l, yo te jwenn pwodui sa yo kache nan plizyè sak sik.
Atik sa se pwopriyete prive ©️ Gwoup Medya MAGHAITI 2024
