Ebrahim Raïssi ki gen 63 an, prezidan Repiblik islamik Iran an, mouri nan yon vòl elikoptè ayè dimanch 19 me 2024 la. Li te gen minis afè etranje l epi plizyè lòt moun ankò ansanm avèk li nan vòl sa a, selon Le Monde, yon jounal fransè.
«Prezidan pèp Iranyen an, travayè ki pa janm fatige a, sakrifye vi l pou nasyon an», se sa a gouvènman an fè konnen nan yon kominike li pibliye. N ap soulinye Ebrahim Raïssi te gen pou tit Ayatollah e li te prezidan peyi sa a depi 3 an.
Gouvènman an te pase anviwon 12èdtan ap chèche otorite sa yo anvan yo anonse mesaj lanmò yo, lendi 20 me a, byen bonè nan maten, bay medya lokal ak entènasyonal yo.
Ebrahim Raïssi te pran pouvwa a nan dat 18 jen 2021 avèk 61.95% vòt nan premye tou eleksyon an kòm konsèvatè epi ranplase Hassan Rohani ki te bat li nan eleksyon prezidansyèl an 2017.
Hossein Amir-Abdollahian, minis afè etranje a, mouri nan laj 60 an e pou anpil moun li te pi bon diplomat peyi a te genyen. Yo te konsidere l kòm yon rezistan akoz divès gwoup li deplwaye nan Mwayen Oryan kont Izrayèl. Minis afè etranje sila a te jwe wòl li epi yo te prezante l tankou yon defansè politik kont loksidan an. Pandan, tout manda li a li te pwofite batay pou l mete bout ak tout sanksyon Ameriken yo te mete sou ekonomi Iran an.
Selon laprès entènasyonal ofisyèl Irna, aksidan elikoptè sa a lakoz lanmò gouvènè pwovens Azèbaydjan oryantal la, Malek Rahmati, vis minis ekonomi an ak Finans Iranyen pou lanne 2023 ak 2024 la. Anplis, Seyyed Mohammad Ali Ale-Hashem, prensipal Imam nan rejyon an (Imam priyè kolektif chak vandredi nan kapital pwovens Tabiz), jwenn lanmò l tou.
«Nou ap prepare n pou n transfere kò yo nan zòn Tabiz» , se sa a responsab kwa Wouj nan peyi sa a deklare.
Atik sa se pwopriyete prive © Gwoup Medya MAGHAITI 2024
