Òganizasyon Biwo Nasyonzini pou Kòdinasyon Zafè imanitè (OCHA) fè konnen jodi vandredi 17 me 2024 la, sòti janvye pou rive mas, ka fanm ak tifi ki sibi vyolans seksis ak seksyèl yo pa sispann monte. Selon chif yo bay, anvan sa yo te jwenn 250 ka vyolans, men kounye a yo soulinye yo monte ak prèske 1 543.
«Fanm ak tifi ki kouri kite kay yo ap fè fas ak gwo vyolans seksis epi eksplwatasyon seksyèl, menm anndan kan refijye yo. Chif ka VBG sa yo fè nou konnen gen yon ogmantasyon ki bay gwo kè sote», daprè sa responsab yo nan OCHA revele pandan yo fè kwè plis pase 70 % nan zak sa yo yo te ka jwenn otè yo.
Yon lòt kote, pou montre vyolans ki fèt sou jan moun yo (VBG), plis afekte sila yo ki nan kan refijye yo, òganis onizyen an presize 78 % moun ki sibi vyolans sa yo se moun ki kouri kite kay yo. Anplis sa, yo di pami moun ki toujou ap viv yo, yo jwenn 80 % ladan yo se fanm epi 16 % se tifi.
Pou kounye a, Òganizasyon Biwo Nasyonzini pou Kòdinasyon Zafè imanitè deklare ajan imanitè yo ap kontinye bay swen sikososyal ak swen medikal pou moun sa yo. Men, yo mande tou pou kominote entènasyonal la ede yo nan lit yo ap mennen an puiske yo soulinye pwojè yo a sèlman finanse ak 7 %.
Pandantan sa, yo soulinye atak bandi ak zam te fè sou Gresye nan lannuit vandredi 10 me pou antre samdi 11 me 2024 la, fè plis pase 4 400 moun kouri kite lakay yo. Chif sa vin ajoute sou anviwon 95 000 lòt ki te deja kouri kite kay yo nan Pòtoprens la selon chif Òganizasyon Migrasyon Entènasyonal (OIM) te bay.
Atik sa se pwopriyete prive © Gwoup Medya MAGHAITI 2024
