Nan yon bilan sismik yo sòti ayè mèkredi 15 me 2024 la, Biwo Min ak Enèji (BME) nan tèt kole ak Inite Teknik Sismoloji (UTS) fè konnen peyi d Ayiti souke 208 fwa sòti janvye pou rive avril 2024 la. Selon yo menm, tranbleman tè sa yo pase ant 0,9 ak 4,4 sou echèl Richter a.
«Selon obsèvasyon rezo lokal yo (Ayiti-séimes ak UTS) ak rejyonal yo (Kiba, Jamayik ak Repiblik Dominikèn), bilan sismik 4 premye mwa ane 2024 la ( janvye pou rive avril) se 208 tranbleman tè ki pase nan nivo 0,9 ak 4,4», se sa responsab yo revele.
Nan menm sans sa a, yo ajoute pou di pou chak mwa yo yo jwenn tè a souke pou pi piti 52 fwa. Jiskounye a daprè yo menm, mwa mas la se mwa ki te gen plis tranbleman tè, yo jwenn li te pase 58 fwa. Aprèsa a, yo idantifye pou mwa janvye a te genyen l sèlman 42 fwa sa ki fè yo di se mwa ki te gen mwens sekous.
«Tranbleman tè nou wè yo fèt nan 9 depatman jewografik; Nòdwès nan tèt lis la, li te souke avèk 25.4%, Nip vini nan 2èm plas la ak 20.1%, Lwès vini an 3èm pozisyon avèk 17.7%», daprè detay ki bay nan rapò sa a ki pote siyati direktè jeneral BME a, Claude Preptit. Pi lwen, yo soulinye depatman Nò, Latibonit, ak Sant pa t gen twòp sekous, pandan Nòdès la li menm yo fè kwè li pa t souke ditou pandan janvye rive avril la.
Atik sa se pwopriyete prive © Gwoup Medya MAGHAITI 2024
