Lapolis nan Gonayiv anonse jodi jedi 9 me 2024 la, yo arete 2 endividi pou enplikasyon yo nan koze kadejak sou yon jèn fanm 19 lane. Yo eksplike endividi yo te kidnape viktim nan e yo te menm gentan pran lajan nan men fanmi l pou yo te libere l.
Jerry Carra ak Destin Jackson se non 2 sitwayen sa yo lapolis akize kòm kidnapè ak moun ki ta vyole jèn fanm 19 lane sila a. Responsab lapolis yo rapòte endividi sa yo te rive rekonèt zak yo repwoche yo a nan moman yo t ap poze yo divès kesyon.
«Yo te fòse fanmi an pou bay 200 mil dola vèt pou libere l. Nan lajan sa a, fanmi demwazèl la te gentan bay 50 mil dola ameriken ak yon lòt pati an goud. Fòk nou di, prezime kidnapè yo rekonèt pou di wi yo te fè kadejak sou viktim nan», daprè detay PNH la bay sou kont fesbouk yo nan sa ki gen pou wè ak arestasyon sa a ki fèt depi yè mèkredi 8 me 2024 la.
Pou kounye a, lapolis fè konprann toulède endividi yo twouve yo nan prizon annatandan lajistis ayisyèn panche sou dosye yo a.
N ap soulinye, Rezo Nasyonal k ap Defann Dwa Moun yo(RNDDH) te fè konnen pou 3 premye mwa ane sa a gen 64 fanm ak tifi ki sibi vyolans seksyèl nan peyi a. Nan rapò sa a yo te pibliye 10 avril ki sot pase a, enstans la presize gen nan fanm sa yo ki viktim asèlman nan men bandi e gen nan yo se pwòp mari yo ki vyole yo.
Atik sa se pwopriyete prive ©️ Gwoup Medya MAGHAITI 2024
