Nan yon seri rapò yo sòti jedi 9 me 2024 la, Òganizasyon Biwo Nasyonzini pou Kòdinasyon Zafè Imanitè (OCHA) fè konnen sitiyasyon imanitè yo vin pi grav nan peyi a. Yo soulinye nan moman sa a sektè sante a nan gwo difikilte menm jan ak dosye manje moun paka jwenn pou yo manje.
«Kriz Kounya a fè bezwen sante popilasyon an vin plis ijan alòske grangou kontinye ap menase pou tonbe sou tèt moun yo», daprè deklarasyon direktè nasyonal pwojè HOPE pou Ayiti a, Didinu Tamakloe. Li avèti, si anyen pa chanje, teritwa nasyonal la pral fè fas kare ak bon jan pwoblèm pou jwenn konprime ak lòt pwodui nesesè pou lasante yo, lè kon sa yo menm ki se ajan imanitè yo p ap ka aji nan okenn ka ijan selon sa l di.
Yon lòt kote, yo sinyale pwoblèm rate gaz la ki ogmante lavi chè a. Yo te tou pwofite pale sou danje kèk timoun vin reprezante nan sosyete a puiske gwoup nèg ame yo fòse anpil ladan yo antre nan gang tandiske gen lòt ki antre pou enterè yo. Se yon sitiyasyon, òganizasyon entènasyonal Save The Children denonse epi konseye pou pi wo yo aji prese prese sou ka sa yo.
Pou sa a ki gen pou wè ak manje, jiskaprezan OCHA fè konnen endis ensekirite alimantè nou an nan nivo 4, sa a ki fè anpil moun nan difikilte pou yo manje. Site Solèy ak kèk zòn metwopolitèn nan se kote responsab yo di gen plis grangou.
Atik sa se pwopriyete prive © Gwoup Medya MAGHAITI 2024
