Manm Konsèy Prezidansyèl Tranzisyon an (KTP) deside fè pwomès avèk divès fanmi viktim ayè samdi 4 me 2024 la, nan depatman Nò a. Yo fè deklarasyon sa yo nan yon moman kote gen omwen 12 moun ki pèdi lavi yo, 4 lòt disparèt, e gen sila yo ki pèdi byen yo nan move tan premye ak 2 me pase a, nan Okap.
«Manm konsèy prezidansyèl la vrèman touche pou katastwòf sa ki lakòz lanmò frè ak sè nou yo nan zòn Baryè Boutèy, nan depatman Nò a», se sa yo ekri nan yon kominike pou laprès, kote yo soulinye gouvènman ki demisyone a ap pran tout mezi pou ede viktim evènman trajik sa.
Lapli ki t ap tonbe san rete nan lannuit premye pou rive 2 me a lakòz deboulonnay tè nan plizyè depatman. Nan Nò anviwon yon 10èn moun nan zòn Labori (Baryè Boutèy)mouri. Nan vil Ench, 2 moun te pèdi lavi yo, Nan Nòdwès espesyalman nan Pòdepè nan espas 7 jou, 5 moun rive mouri epi 2 lòt sòti blese, daprè SOS HAÏTI-MÉTÉO.
Daprè premye bilan Pwoteksyon Sivil te bay sou inondasyon sa yo, yo te di gen anviwon 13 moun ki mouri. Tandiske Kounya la chif yo ogmante puiske nan Pòdepè gen anviwon 5 moun ki viktim sòti dimanch 28 avril la pou rive nan lannuit samdi 4 me 2024 la. Mete sou sa, gen 25 kay ki kraze epi 2 260 lòt anvayi avèk dlo.
Pa rapò avèk ensidan sa, Konsèy la fè konnen li pral mete ansanm avèk konseye nan depatman Nò yo pou panche sou sak rive a. Pandanstan, yo konseye moun yo pou respekte lòd pou sekirite direksyon Pwoteksyon sivil ak otorite lokal nan vil yo bay.
Pou fini, 9 manm konsèy la pwofite okazyon sa pou li eksprime detèminasyon l pou li mete kanpe mwayen pou amelyore kondisyon lavi tout popilasyon an.
Atik sa se pwopriyete prive © Gwoup Medya MAGHAITI 2024
