Nan yon nòt Ministè Kilti ak Kominikasyon an pibliye jodi jedi 2 me 2024 a, yo fè konnen atravè inite idwometeyowolojik peyi D Ayiti, gen yon avi inondasyon sou 8 depatman ki deja resevwa anpil lapli depi kòmansman semèn nan.
«Plizyè fenomèn meteyowolojik te deja lakòz aktivite lapli sou Ayiti. Pou jodi a, se pasaj yon zòn ba presyon nan direksyon Lès peyi Kiba ki pwovoke lapli ak loray sou rejyon Karayib la», se yo yo ekri nan nòt sila pou enfòme popilasyon an.
Selon inite idwometeyowolojik sitiyasyon gwo lapli depi ayè premye me 2024 la, lakòz 8 depatman touche tankou Grandans, Nip, Sid, Nò, Nòdès, Nòdwès, Lwès epi Sant lan gentan touche epi menm gen inondasyon.
«Aktivite lapli yo ap kontinye jiska vandredi 3 me 2024 la. Sitiyasyon sa a lakòz inondasyon sanzatann sou plizyè depatman ki anba lapli yo», se sa responsab yo soulinye atravè Ministè Kilti ak Kominikasyon.
Pandanstan, inite idwometeyowolojik peyi D Ayiti ak direksyon jeneral pwoteksyon sivil mande avèk tout moun pran prekosyon. Alèt sila espesyalman pou moun k ap viv nan zòn riske yo, ki sitou gen inondasyon pou yo rete veyatif ak gwo menas sila.
Pou yo fini, yo eksplike se pou tout rezon sa yo, yo mete avi menas inondasyon ak glisman teren sou depatman Grandans, Nip, Sid, Nò, Nòdès, Nòdwès, Lwès ak Sant.
Atik sa se pwopriyete prive © Gwoup Medya MAGHAITI 2024
