Nèg ak zam moun pa rive idantifye atake epi vòlè plizyè materyèl nan lokal jounal Le Nouvelliste. Selon sa a responsab yo di, endividi yo fè plizyè jou ap monte desann nan espas yo a ki chita kò l nan ri Disant.
«Direksyon jounal Le Nouvelliste enfòme tout moun an jeneral kèk endividi moun pa rive idantifye ap antre, depi plizyè jou nan lokal jounal la, ki twouve l nan ri Disant, Pòtoprens“, daprè sa yo fè konnen nan yon atik yo ekri nan lannuit jedi 25 avril 2024 la.
Pou sa a ki konsène materyèl yo pran yo, yo presize endividi yo ale ak divès materyèl tankou mobilye ak premye eleman enpòtan pou enpresyon jounal papye yo. Anplis sa a, yo sakaje plizyè ekipman ki nan espas la.
Fas ak sitiyasyon sa a, responsab medya sa a ki gen 125 lane depi l ap bay popilasyon ayisyen an sèvis di y ap kontinye fè sa a. Men, yo soulinye se nan vèsyon nimerik yo a sa ap fèt. Annatandan, yo remèsye tout moun ki ba yo kout men nan moman difisil sa a, pandan yo soulinye yo menm yo lage dosye sa nan men lajistis ayisyèn ak lapolis puiske yo raple wòl yo se pwoteje lavi ak byen sitwayen yo nan peyi a.
N ap fè konnen tou, “Livres en folie” Le Nouvelliste nan tèt kole ak Unibank toujou òganize chak ane depi 1995, responsab yo te deside madi 23 avril la, pou mete 30yèm edisyon an nan yon lòt dat. Daprè eksplikasyon pi gwo responsab jounal la, Max Chauvet, te bay se akòz sitiyasyon sekiritè peyi a ki fè yo te blije pran desizyon sa a, e jouskounya li te di tou yo pa konn kilè 30èm sa a ap ka fèt pou ane sa a.
Atik sa se pwopriyete prive ©️ Gwoup Medya MAGHAITI 2024
