Kèk tan aprè 9 manm Konsèy Prezidansyèl la prete sèman epi enstale nan tèt peyi a jodi jedi 25 avril 2024 la, reprezantan plizyè peyi tankou Etazini, Lafrans, Kanada reyaji pou bat bravo pou pwosesis sa a. Selon yo menm, demach sa a se yon etap enpòtan pou tabli demokrasi a an Ayiti.
Sekretè adjwen pou zafè emisfè oksidantal ameriken an, Brian Nichols fè konnen sèman ak enstalasyon manm konsèy prezidansyèl tranzisyon an se yon etap enpòtan pou mete nan peyi a yon gouvènman enklizif. Se pou sa a, li felisite tout aktè ki pran angajman pou te bout ak aksyon sa a.
Yon lòt kote, Anbasad amerikèn
fè kwè kounye a la anbasadè yo a pa ka tann kilè pou l bay lèt kreyans li yo bay manm konsèy la. «Anbasadè Hankins te kontan asiste seremoni enstalasyon Konsèy Prezidansyèl Tranzisyon (KPT) an jodi a. Li felisite manm yo paske yo te travay ansanm pou pase etap enpòtan sa a pou pèp Ayisyen an. Anbasadè Hankins pa ka tann kilè pou l bay lèt kreyans li yo bay konsèy la a avan lontan», daprè sa a responsab yo ekri nan yon pòs yo fè sou paj Fesbouk yo.
Se menm jan an anbasadè fransè a, Fabrice Maurice pwomèt Lafrans ap travay men nan men ak Konsèy la pou reyisit yo nan travay y ap gen pou yo fè yo.
Biwo Entegre Nasyonzini an Ayiti (BINUH), yo menm nan bò pa yo, rete kwè enstalasyon sa a se yon nouvo opòtinite pou Ayiti avanse nan direksyon pou rekanpe enstitisyon demokratik yo. Yo menm yo pwomèt, y ap kenbe angajman yo pou akonpanye otorite ayisyen yo nan jefò y ap fè pou kreye kondisyon pou tabli lapè sosyal, bay asirans pou òganizasyon eleksyon kredib k ap fèt kote pou tout ayisyen kapab patisipe.
N ap soulinye, depi kounye a nan diskou enstalasyon 9 manm KPT a yo tou angaje yo pou etabli sekirite piblik, òganize konferans nasyonal ak refòm konstitisyonèl, reyalize eleksyon, retabli lajistis epi remete kanpe enstitisyon yo ak ekonomi peyi d ayiti.
Atik sa se pwopriyete prive ©️ Gwoup Medya MAGHAITI 2024
