Òganizasyon Biwo Nasyonzini pou Kwòdinasyon Afè imanitè (OCHA) fè konnen jodi jedi 25 avril 2024 la, yo sispèk 82 875 ka kolera nan kèk zòn nan peyi a. Daprè sa yo fè konprann nan rapò ki trete dosye sa a, Òganizasyon Mondyal Sante (OMS) rive resanse ka sa yo pou pita 11 avril ki sot pase a.
«11 avril la, depi lè kolera te fin reparèt oktòb 2022 a, Òganizasyon panamerikèn Sante ak Òganizasyon Mondyal Sante (OPS/OMS) di gen 82 875 ka sispèk kolera», anplis pandan menm peryòd la, yo soulinye gen 80 436 moun ki te sou kabann lopital ak 4 836 ka konfime epi 1 270 moun mouri.
Nan rapò sa a, OCHA fè konprann divès depatman tankou Latibonit, Sant, Nò ak Lwès se kote yo anrejistre pi plis ka.
Yon lòt kote, yo di rive 20 avril pase a, yo te resanse 90 254 refijye nan zòn Metwopolitèn nan. Moun sa yo twouve yo nan 85 sit tandiske 36 ladan yo se lekòl.
Pou sa a ki gade èd imanitè yo, OCHA fè konprann pa bò kote pa yo, yo deja distribiye 8 kamyon pwodui alimantè nan zòn Miragwàn. Epi yo bay 6.5 lit dlo ak plis pase 60 000 refijye nan zòn Pòtoprens.
Atik sa se pwopriyete prive ©️ Gwoup Medya MAGHAITI 2024
