Ansyen prezidan pwovizwa Jocelerme Privert te reponn envitasyon jij enstriksyon Merlan Belabre, jounen jodi 22 avril 2024 la, sou dosye koripsyon Sant Nasyonal Ekipman (CNE).
«Kòm mwen te di pa gen moun k ap fè m kache, mwen fè 26 mwa prizon enjisteman pou yon makakri.», sa a se deklarasyon ansyen prezidan pwovizwa a, Jocelerme Privert, sou dosye Koripsyon nan CNE.
Ansyen senatè Jocelerme Privert te derefize parèt devan Al Duniel Dimanche ki te lanse manda kont li nan dat 26 janvye ki sot pase a. Li te pito pase devan jij enstriksyon Merlan Belabre jodi lendi 22 avril la.
«Etandone, mesye Al dimanche t ap fè vakabondaj ak mwen, genyen yon nouvo jij ki envite m pou m fè li konnen verite sou dosye sa a , m te reponn prezan», se l ajoute bay medya Passion infos.
Seyans la te dire anviwon 1 èdtan e ansyen senatè a di l mande jij la pou l anile tout desizyon jij Al Duniel Dimanche te pran kont li.
N ap raple n jij Merlan Belabre te fè libere ansyen palmantè Cholzer Chancy kèk mwa apre jij Al Duniel Dimanche te mete l nan prizon sivil Penitansye Nasyonal d Ayiti. Se menm jij sa a tou ki te akize, Martine Moïse, madanm ansyen prezidan Jovnel Moïse la, sou menm dosye kòripsyon nan CNE a.
