Lejislatè nan peyi Etazini dakò yon demann ki fèt pou entèdi TikTok sou teritwa ameriken an, ayè samdi 20 avril 2024 la, si pwopriyetè platfòm yo pa vann yo li.
Anplis , depite ameriken yo egzije sosyete chinwa « ByteDance» pou l retire kò li kòm youn nan aksyonè aplikasyon sa a, atravè yon videyo tou kout, nan yon delè 9 mwa osnon yo ap sispann li sou teritwa a.
Selon jounal NBC, peryòd pou yo vann platfòm TikTok la ka pwolonje 1 an anplis, se sa a prezidan Joe Biden rapòte. Pandan tan sa a, lejislatè ameriken yo di platfòm sa a reprezante yon gwo menas pou sekirite peyi a akoz gouvènman chinwa a ka itilize done itilizatè yo nan nenpòt moman.
Anplis, lejislatè sa yo menm akize Lachin paske li te itilize TikTok pou li te enfliyanse mitan eleksyon 2022 a, epi yo menm prevwa li ka patisipe nan eleksyon ki pral gen pou fèt nan mwa novanm lan si yo ta gen volonte : «Nan elaji divizyon nan sosyete ameriken an».
Pou fini, depite yo ta dwe vote samdi k ap vini an plizyè pwojè lwa k ap otorize yon pwogram èd etranje nan montan 95 000 000 000 Dola ak peyi Ikrèn epi izrayèl, avèk yon èd sekirite tou nan «Indo-Pacifique».
Atik sa se pwopriyete prive ©️ Gwoup Medya MAGHAITI 2024
