Nan yon rapò yo sòti jodi vandredi 19 avril 2024 la, Biwo Entegre Nasyonzini an Ayiti (BINUH) fè konnen pou 3 premye mwa ane sa gen 2 505 moun yo jwenn ki mouri oswa blese nan vyolans peyi a ap fè fas ak li a. Daprè yo menm, chif sa ogmante ak plis pase 53 % pa rapò ak 3 dènye mwa ane 2023 a.
“Pandan premye trimès ane 2024 la, BINUH anrejistre 2 505 moun ki mouri epi ki blese, aprè vyolans ki gen rapò ak gang yo, yon ogmantasyon ki plis pase 53 % pa rapò ak peryòd avan an (oktòb, novanm, desanm 2023)”, daprè sa yo di. Anplis, yo revele avèk chif sa yo, yo jwenn 3 premye mwa ane 2024 la se peryòd ki te gen plis vyolans sitou lè yo konsidere l ak kòmansman ane 2022 a.
Yon lòt kote, yo fè kwè pou menm tan an gen omwen 438 ka kidnapin yo resanse pou depatman Lwès ak Latibonit. Nan sans sa, yo soulinye tou depatman Latibonit la se youn nan kote ki viktim plis ak vyolans gang yo, nan divès atak yo fè kont popilasyon an pandan yo pwofite touye moun yo san bliye kidnape plizyè moun ki te nan machin transpò.
Òganis onizyen an panche sou ka polisye ki mouri yo, bilan prizonye ki te sove aprè atak sou prizon Kabarè ak Penitansye Nasyonal la 2 mas pase a, ak komisarya ki boule yo. Se pou sa, yo presize gen 19 ajan ki mouri oswa blese, tandiske plis pase 4 600 prizonye te chape poul yo. Genyen tou pou pi piti 22 komisarya ak sou komisarya bandi yo rive boule.
Atik sa se pwopriyete prive ©️ Gwoup Medya MAGHAITI 2024
