Alòske enstitisyon polisyè a te pèdi anviwon 37 ajan pou ane 2023 a, pou ane 2024 la sitiyasyon an pa chanje puiske Rezo Nasyonal k ap Defann Dwa moun yo (RNDDH) montre pou sèlman 3 premye mwa ane sa gen 13 lòt ki tonbe anba bal bandi. Yo presize nan yon rapò, pami 13 ajan sa yo, gen youn nan yo se popilasyon an menm ki te touye l nan Mibalè.
Nan yon premye tan men polisye ki pèdi lavi yo sòti 5 janvye pou rive 29 fevriye pase a, selon chif RNDDH yo: Merlince Sévère (ajan direksyon jeneral lapolis), Roubens Lector (ajan SWAT Team), Rémy Cynce ki t ap travay nan Sèvis Depatmantal Polis Jidisyè Nò (SDPJ-Nord), Getro Cadet (ajan UDMO), Junior Marion, Monode Etienne, Espéra Pierre, Luciana Pierre, Guilliamson Jean-Baptiste, Pautrace Resula.
Pou mwa mas la li menm, Enstans k ap jere dwa moun nan mansyone gen 3 polisye ki mouri, anplis 2 lòt ki te sòti blese anba bal. Anel Noël, Joveny Duplan, se non ajan sa yo ki youn aprè lòt t ap travay nan laprimati (USPM) ak nan Kò Entèvansyon Lòd (CIMO).
Kontrèman ak 12 lòt polisye yo, Ananel Alexandre li menm se sèl polisye ki viktim nan operasyon “bwa kale” popilasyon an te fè sou li nan dat 29 mas 2024 la. Li ta pral mouri li menm ak Michelet Musca, ki te yon ajan sekirite nan Konsèy Elektoral Pwovizwa (CEP) akòz yo te sispèk yo ta pral achte bal pou nèg ak zam.
N ap fè konnen tou pou menm mwa mas la, maladi te pote ale 2 polisye. Selon Sendika Nasyonal Lapolis la (SYNAPOHA), enstitisyon an pèdi Antoine Edwidge ak Estinor Angelot, nan espas 2 jou sèlman. Toulède polisye sa yo te sòti nan 31yèm pwomosyon lapolis la.
Atik sa se pwopriyete prive ©️ Gwoup Medya MAGHAITI 2023
