Rezo Nasyonal k ap Defann Dwa moun yo (RNDDH), nan yon rapò yo sòti ayè mèkredi 10 avril 2024 la, deklare bandi ak zam mete pou pi piti 13 pòs pou pran lajan nan men moun anndan peyi a. Selon detay yo bay yo, nan Pòtoprens la sèlman kèlkeswa chofè k ap pran wout Sid la pou rive Fontamara li gen 3 pòs pou l peye pasaj.
Si selon Òganizasyon Nasyonzini (ONU), gang yo okipe 90% teritwa ayisyen an, Kounya la avèk enstalasyon pòs peyaj yo nan plizyè zòn, endividi ak zam yo kontinye montre fòs yo nan simen latwoublay tout fason. Se sa ki fè avèk nouvo chif RNDDH yo, yo fè konprann pou moman sa a, yo menm nan tèt kole ak Sendika Mouvman Inifye Transpòtè Ayisyen yo (MUTH) resanse gen pou pi piti 13 pòs kon sa a nan peyi a.
Pou Pòtoprens la, responsab yo di gen 3 pòs peyaj ki enstale. Gen youn nan Riyèl Alèt tou pre simityè Pòtoprens, youn Matisan e lòt la nan zòn Fontamara. Anndan komin Site Solèy se menm bagay la, yon pòs twouve l nan wout pou sòti nan Tèminal Vare a, youn chita kò l nan Lasalin, epi lòt la yo mete l nan zòn Douya, daprè eksplikasyon enstans dwa moun nan.
Sou wout Nasyonal nimewo 1 an li menm, yo soulinye nèg ak zam yo mete 2 pòs, premye a se nan wout ki ant Titanyen ak Senmak la, tandiske lòt la nan zòn Gonayiv. Pou wout Nasyonal nimewo 2 a, pòs pa l yo mete nan zòn Paloma (tou pre simityè Kafou a), ak Maryani.
Onavil 12 ki twouve l sou wout Nasyonal nimewo 3 a genyen yon pòs pou bandi pran lajan. Pou fini, yo presize genyen 2 pòs tou yo resanse sou Wout Nasyonal nimewo 5 ak 8 la, kafou pou peye yo twouve yo espesyalman ant Gwo Mòn ak Pòdepè, epi sou wout Kalvè a nan Kwadèboukè.
Se yon sitiyasyon jouskaprezan ki pèmèt nonsèlman moun paka sikile gratis nan peyi a, men tou ki rann lajan transpò yo monte pi plis. Alòske sitiyasyon ekonomik chofè yo, yo menm, vin pi mal. Li pi mal puiske lajan yo touche yo, yo fin bay yo nan divès pòs bandi yo pase, si n kwè pawòl yo konn ap deklare depi avan sa a nan mikwo laprès.
Atik sa se pwopriyete prive ©️ Gwoup Medya MAGHAITI 2023
