Nan yon rapò yo pibliye jodi mèkredi 10 avril 2024 la, Rezo Nasyonal k ap Defann Dwa Moun yo (RNDDH) fè konnen sòti mwa janvye pou rive mwa mas 2024 la, nèg ak zam touye pou pi piti 208 moun. Mete sou sa a, yo presize pandan menm peryòd la gen 67 moun nan moun sa yo ki pèdi lavi yo nan atak bandi ak zam fè sou popilasyon an.
«Pou peryòd janvye pou rive mas 2024 la, pou pi piti gen 208 moun yo ansasinen. Kadav 55 nan viktim sa yo se moun k ap pase nan lari ki dekouvri yo», daprè sa yo di. Se nan sans sa a, yo vle atire atansyon n sou divès ka tankou ansasinay 7 pasaje nan yon ti bato Maryani, 9 kadav ki te boule nan Dèlma 19, anplis lanmò 5 ajan BSAP nan Laboul 12, jou ki te 7 fevriye 2024 la.
Anplis kantite moun sa yo ki mouri nan divès sikonstans, RNDDH fè konprann pou 3 premye mwa nan ane a yo resanse pou pi piti 5 atak ame sou popilasyon an. Pou atak sa yo, yo soulinye gen anviwon 67 moun ki rive pèdi lavi yo. Nan ka sa a, yo site plizyè zòn ki sibi atak sa yo tankou Solino, Belè, Waf Jeremi, Lasalin, Pènye ak Gantye kote bandi yo antre touye moun epi boule kay yo.
Pou sa ki konsène moun ki blese ak bal yo, RNDDH rapòte gen pou pi piti 158 sitwayen ki viktim anba bal. Pami yo, yo lonje dwèt sou ka 2 polisye ki te pran bal 29 fevriye 2024 la, yo fè konnen ajan sa yo t ap travay nan sou komisarya Bon Repo a ak nan komisarya Ayewopò a.
Atik sa se pwopriyete prive ©️ Gwoup Medya MAGHAITI 2023
