Nan nouvo rapò Rezo Nasyonal k ap Defann Dwa Moun yo (RNDDH) mete deyò mèkredi 10 avril 2024 la, yo di yo anrejistre 64 fanm ak tifi ki sibi vyolans seksyèl nan 3 premye mwa ane a. Selon presizyon yo fè, fanm sa yo viktim nonsèlman nan men bandi, men gen nan yo se pwòp mari yo ki vyole yo.
«Sòti janvye pou rive mas 2024 la, Òganizasyon feminis Nègès Mawon ak RNDDH resevwa 64 viktim vyòl. Anpil nan viktim sa yo sibi vyòl kolektif nan men bandi», se sa yo fè konnen pandan yo presize tou fanm sa yo viktim se nan divès atak endividi ak zam fè nan plizyè zòn nan peyi a.
Si gen fanm ak ti fi ki sibi vyòl nan men gang, RNDDH fè tout moun konnen gen nan fanm sa yo se pwòch yo ki fè vyolans sou yo. «Anpil lòt se mari yo ak pwòch yo ki vyole yo», selon sa yo ajoute.
Yon lòt kote, n ap raple n pami moun ki pèdi lavi yo nan atak bandi fè sou sivil yo, divès fanm te jwenn lanmò yo tou. Myrtha ak Esther Turnier, ki li menm te yon responsab nan Kolèj Klasik Feminen (CCF) te pami moun ki te tonbe anba bal nèg ak zam nan dat 28 mas 2024 la, nan zòn Laboul 17.
Atik sa se pwopriyete prive ©️ Gwoup Medya MAGHAITI 2023
