Jounen jodi jedi 4 Avril 2024 la, lapolis nan vil Okap rive mete men sou youn nan chèf gang Savyen yo byen bonè nan maten. Gladymir Joseph alyas Dèdè anba kòd pandan l t ap eseye kite peyi d Ayiti pou l ale Etazini, selon divès enfòmasyon k ap sikile sou rezo sosyal yo.
Gladymir Joseph alyas Dèdè se 3èm chèf gang nan baz Savyen an ki chita kò li nan depatman Latibonit. Li nan men lapolis pou kounye a pandan li t ap pare kò l pou li al pran avyon nan depatman Nò peyi a nan kad pwogram «Humanitarian Parole» gouvènman Biden lan te lanse depi mwa Janvye 2023.
Gladymir Joseph alyas Dèdè ki gen 38 lane sou tèt li te pral jwenn arestasyon li anba men inite nan lapolis Biwo Lit kont Trafik Estipefyan (BLS) nan entèval 10è nan maten. Kòmandman Lapolis la te gen yon alèt sou chèf gang sila a ki t ap eseye kite peyi a, se pou sa a yo te lanse yon operasyon. Nan moman an la chèf gang sa a nan gadavi nan 2èm vil peyi a.
N ap raple, lapolis te touye chèf gang Site Doudoun nan, nan dat ki te 2 avril ki sot pase nan komin Kwadèboukè, ki gen pou non vanyan «New York New York», yo te menm rive sezi zam nan operasyon sa a.
© Tous droits réservés – Groupe Média MAGHAITI 2024
