Pòtoprens, jounen madi 2 avril 2024._ Se pa pwason davril, se pa yon blag, gang yo pran kontwòl zòn Metwopolitenn nan epi se yo k ap enpoze lalwa. Se pa jwèt ti bebe k ap fèt atè a, se gwo zam lagè k ap chante nan zòrèy popilasyon an tout lasentjounen, se moun k ap mouri pa pil pa pakèt, se biznis y ap dechouke epi fè kadejak sou fanm lè yo vle. Se sa ki rele anachi a !
Pa gen voye wòch kache men, pou kounya nou paka rele mesyedam “Viv ansanm” yo bandi ankò, yo rive nan faz « teyoris » la. Aprè gwo tonton atak planifye kriminèl yo sot fè sou prizon Penitansye ak prizon kwadèboukè a, ki lakòz plis pase 4000 prizonye sove ; aprè atak ki sot fèt sou plis pase yon 15èn antèn lapolis ki lakòz 5 polisye mouri sou plas, aprè sendika bandi yo fin boule tout famasi ki bò lopital jenaral yo, sakaje epi boule inivèsite ak lekòl… kategori moun sa yo pwouve yo se bon teyoris la !
Poutan gen yon pati moun ki kontinye kwè se revolisyon k ap fèt nan lari a pou popilasyon an gen lavi miyò. Moun yo fin tounen avoka bandi sou tout entènèt la, yo di nèg a zam yo tande priyè yo, yo rive bouch zam yo sou moun ki t ap finanse yo. Avoka bandi yo menm di se sèl nèg ak zam ilegal ki ka delivre peyi sa. Yo menm rale Nelson Mandela ak Fidel Castro kòm egzanp, kòmkwa ewo sa yo te bandi tou avan yo te pran desizyon pou delivre peyi yo.
Men fòk nou di ti avoka sèvèl poul sa yo Fidel Castro ak Nelson Mandela te fè pati yon gwo mouvman rebelyon pou te libere peyi yo kont yon sistèm peze souse. Non yo pa te janm site nan kidnapin ni kadejak ni nan vòlè ni nan masakre sa ki pi pòv yo.
Nou konnen gen gwo lajan k ap bay pou enfliryansè yo lave sèvo pèp la sou rezo sosyal yo, nou konnen tou gen yon pakèt ti medya anliy k ap travay pou teyoris yo menm jan tou gen yon bann ti foulay k ap bat bravo ak kontantman pou zak teyoris sa yo yon fason pou yo ogmante odyans yo. Men nou menm kote pa nou, n ap toujou fè travay nou jan sa dwe fèt san nou pa pran pozisyon pou bouwo yo.
Poukisa teyoris yo ajite konsa ? bagay la senp, gras ak pwogram Biden nan plis pase 150.000 moun gentan apwouve epi kite Ayiti. Gen yon bon valè moun tou ki pase pa wout pa bwa pou tonbe nan peyi Meksik epi y ap tann yo reponn demann azil politik yo, se menm jan tou gen yon bon valè ki kouri al pran yon souf nan peyi Sendomeng. Moun ki pa gen mwayen kite peyi a pran desizyon retounen nan vil pwovens epi abandone depatman Lwès la bay kriminèl yo. Tout gwo biznisman yo gentan lage pye yo, tout moun nou konn rele “Boujwa” oubyen “Siwo libanè” yo fèmen biznis yo epi peye elikoptè byen chè pou kite peyi lanfè sa ak fanmi yo. Kidonk atè a pa gen afè ankò, gen gwo ratman nan komès kidnapin nan ak rakèt nan lari a. Se sèl aktivite pase dwòg la k ap mennen men se gang Vilaj Dedye a ki bay plis randman, se Izo ki gen kontwòl aktivite sa.
Teyoris yo mete pye yo atè se pa paske yo te gen yon pwoblèm ak Ariel Henry vre, yo pa te janm gen pwoblèm ak boujwa yo vre, bon dayè moun sa yo te ansyen patwon yo, gen yon epòk se pou moun sa yo gang yo t ap travay. Pa gen okenn revolisyon vre, tout ajisman yo se paske pa gen afè atè a ankò, yo deside pran pouvwa a pou yo legalize aktivite kriminèl yo. Se menm bandi legal yo, 50 kòb ak degouden!
Pou moun ki kontinye kwè nan Guy Philippe yo, n ap di yo kontinye gen lafwa menm jan ak yon timoun ki kwè nan tonton nwèl. Nou mete Ti Guy nan menm kategori ak Jimmy Chérisier alyas Babekyou, dayè li fenk sot pase 6 an nan prizon kay Tonton Sam poutèt li te konn brase lajan dwòg. Bon ki lajwa pou yon moun serye gen nan yon swadizan lidè konsa? Dayè Guy Philippe toujou nan tèt yon gwoup gang nan vil Pestèl, li te kreye l aprè li te fin batay kont rejim Lavalas la nan lane 2004.
Guy Philippe ap mande amnisti pou gang yo yon fason pou l ka jwenn sipò yo pou pran pouvwa a, nou menm n ap mande netwayaj, pa gen sitirans !
Pou moun k ap mande nou pozisyon nou sou sitiyasyon peyi a, n ap di yo nou ankouraje Konsèy Prezidansyèl la paske pou nou se gwo egzèsis demokrasi ki ka debouche sou yon tranzisyon ki ka òganize eleksyon pou remete peyi a sou ray. Nou konprann gen reta nan pwosesis la paske se plizyè fòs politik ki gen menm vizyon k ap eseye jwenn yon antant, men fòk nou di yo tou peyi a paka tann ankò. Nou ta renmen pou Konsèy Prezidansyèl Tranzisyon an ateri epi panche sou dosye ensekirite a rapid, yon fason pou fasilite vini fòs militè etranje a. Paske sa ki gen atè a lapolis la paka jere l, se militè ki batay ak teyoris !
Atik sa se pwopriyete prive ©️ Gwoup Medya MAGHAITI 2024
