Selon nouvo bilan yo bay pou ane a, Gwoup Sipò Rapatriye ak Refigye yo (GARR) fè konnen sòti janvye pou rive novanm 2023, gen 224 414 migran ayisyen otorite dominiken yo depòte voye Ayiti. Konsa, yo soulinye se anviwon 492 140 migran antou ki sòti Repiblik Dominikèn pou antre an Ayiti pou ane a.
Responsab GARR la, Guillaume Sam fè konprann chif 492 140 migran sa a divize an plizyè kategori. Premye pati a se moun dominiken yo depòte, dezyèm nan se moun ki deside tounen Ayiti san pyès moun pa fòse yo, ak dènye kategori a ki se sila yo responsab dominiken yo rive kenbe nan wout e tou voye yo tounen nan peyi a.
“Nou genyen 224 414 rapatriye sòti janvye pou rive novanm, nou anrejistre 216 030 moun ki deside vini poukont yo, e nou gen antou 51 496 refoule”, selon tout detay Guillaume bay nan kad rapò sila.
N ap raple pou sèlman madi ki te 12 desanm nan Direksyon Jeneral Migrasyon (DGM) nan Sendomeng te voye tounen 324 migran ayisyen yo te kenbe ap antre sou teritwa yo a nan zòn Bahoruco. Pami sitwayen sa yo, te gen 247 gason ak 50 fanm selon sa yo te fè konnen nan yon nòt.
Atik sa se pwopriyete prive ©️ Gwoup Medya MAGHAITI 2023
