Nan yon nòt yo sòti jodi lendi 13 novanm 2023 a, responsab delegasyon depatmantal Nòdès la nan tèt kole ak Direksyon depatmantal ministè komès ak endistri epi meri Wanament la fè konnen yo entèdi kèlkeswa moun li ye a pou ta itilize pon oubyen rès zòn fwontalye Wanament yo pou fè antre nan peyi a machandiz ki sòti Repiblik Dominikèn.
Aprè yo konstate malgre tout dispozisyon yo pran pou anpeche komèsan ayisyen al achte nan peyi vwazen an tout sa pa janm respekte vre, jounen jodi a otorite yo deside aji yon lòt fason ak moun yo nan Wanament. Gwo machann, ti machann espesyalman sila yo ki nan mache enfòmèl yo, chofè machin divès kalite pa dwe pran chans antre nan peyi a ak okenn machandiz.
Si sa rive yon moun ta derespekte règleman sila, responsab yo anonse y ap pran gwo sanskyon kont moun sa. Pou sa ki gen rapò ak mèt machin yo menm, yo fè konnen chofè machinn sa yo ka peye sòti 50 000 goud pou rive 500 000 goud si yo ta rive sezi kèlkeswa machin nan ak machandiz kontrebann nan yo.
“N ap arete epi bay pinisyon ak tout moun ak chofè machin tout kalite nou kenbe nan komin Wanament ak kèlkeswa machandiz li ye nan men yo ki sòti Repiblik Dominikèn jan lalwa ayisyèn sou kontrebann di sa. N ap boule, bay oubyen vann si posib tout machandiz nou jwenn yo, epi n ap remèt machin nou sezi yo bay mèt yo aprè moun sa ta bay lameri sòti 50 000 goud pou rive 500 000 goud selon sa moun ki siyen yo ap deside“, daprè sa ki di nan nòt la.
Selon sa otorite yo fè konprann, desizyon sa ta dwe kòmanse aplike depi demen madi k ap 14 novanm 2023 a.
Atik sa se pwopriyete prive ©️ Gwoup Medya MAGHAITI 2023
