Nan kad yon seyans ki te gen nan Palman kenyan an jodi jedi 9 novanm 2023 a, minis enteryè yo a, Kithure Kindiki fè konnen peyi Kenya pap voye okenn polisye an Ayiti toutotan peyi ONU yo pa degaje yo pou ba yo lajan yo ta dwe bay la. Selon Periodico Hoy, responsab Kenyan an presize operasyon yo a ap koute anviwon 225 millyon ewo, kidonk se kòb sa menm pou yo jwenn avan pou yo ta vinn an Ayiti.
“Twoup nou yo pap fè yon pa si tout resous yo pa rasanble, ak si yo pa nan men nou“, se sa minis afriken an deklare douvan Palman an pandan l fè konprann se konsa menm yo te gentan mete yo dakò. Puiske selon li menm, se peyi manb Òganizasyon Nasyonzini (ONU) yo ki te gen responsabilite pou òganize yo ant yo menm epi rasanble 225 milyon ewo pou rann posib misyon yo ta dwe mennen an Ayiti a.
Malgre li fè deklarasyon sila, sa pa anpeche l anonse bò kote pa yo yo deja kòmanse idantifye moun y ap gen pou voye yo. Se pou sa, li di yo pran tout angajman pou asire yo chak grenn polisye sa yo ap ka tout bon vre ranpli misyon y ap gen pou vinn ranpli a.
N ap raple Wo kou Kenya a entèdi jouskaprezan polisye Kenya yo pou ta vinn opere nan peyi a. Poutan selon minis Kithure Kindiki, dezisyon sa se sèlman palman kenyan an k ap ka gen dènye mo nan dosye sa.
Atik sa se pwopriyete prive ©️ Gwoup Medya MAGHAITI 2023
