Nan kad ankèt k ap mennen sou masak ki te fèt sou fidèl Pastè Marcorel Zidor yo 26 dawout pase a, jodi madi 10 oktòb 2023 a lidè relijye a te resi al reponn kesyon lajistis. Daprè avoka pastè a, Phizema Palvin, li gen pou l ta retounen devan jij nan jou k ap vini yo.
Aprè l te finn deside pa reponn ak envitasyon Komisè gouvènman Kwadèboukè a, Roosevelt Zamor ak envitasyon Direksyon Santral Polis Jidisyè (DCPJ) te fè l yo, jodi madi a Pastè Marcorel Zidor tout moun konnen sou non pastè Marco te resi parèt douvan jij Brunet Salomon nan tribinal premye enstans Kwadèboukè.
Daprè deklarasyon avoka li Phizema Palvin, pastè a rive reponn tout kesyon yo te poze l yo, e ta dwe tounen ankò pou yon lòt odisyon nan jou k ap vini yo.
Nan sa ki gen pou wè ak legliz Evanjelik Pisin Bethesda l ap dirije e ki te fèmen an, defansè dwa moun nan fè konnen sanksyon ministè kilt te pran kont legliz la leve e tou pwofite anonse y ap gen pou yo fonksyone nan yon ti tan tou kout.
Atik sa se pwopriyete prive ©️ Gwoup Medya MAGHAITI 2023
