Menm jan yo te anonse l nan jou pase yo, jodi lendi 2 oktòb 2023 a, gwo pwodiktè met ansanm ak ti pwodiktè dominiken pou t al depoze plizyè milye ze pouri nan pye moniman peyizan yo ki chita kò l nan zòn Moca. Yo fè aksyon sila se pou pwoteste kont gouvènman dominiken an ki fèmen fwontyè ayisyano-dominiken an depi plis pase 2 semèn, selon Diario Libre.
“Objektif nou se atire atansyon gouvènman an sou gwo defisi pwodiktè yo ap fè chak jou akòz yo kenbe desizyon pou kenbe fwontyè terès ak Ayiti a fèmen“, daprè deklarasyon youn nan patisipan mouvman an, Elvis Quezada.
Yon lòt kote, toujou pou evite pèdi lajan sou ze ki te deja fèt yo, divès pwodiktè te deside pote nan manifestasyon sila a 200 000 ze pou fè popilasyon dominiken an kado.
Sou dosye ministè agrikilti ki te siyen akò ak kèk gwo pwodiktè ze pou achete machandiz yo nan men yo vandredi pase a, pwotestatè yo denonse akò a paske selon yo menm se yon plan ankachèt ki plis vize gwo palto ki gen lyen ak gouvènman dominiken an. Konsa, yo mande pou otorite yo pibliye non tout moun sa yo ki ap patisipe nan pwogram ankachèt sa.
Atik sa se pwopriyete prive ©️ Gwoup Medya MAGHAITI 2023
