Prèske yon lane depi premye minis Ariel Henry te mande entèvansyon etranje sou sòl la, jodi lendi 2 oktòb 2023 a, Òganizasyon Nasyonzini resi vote pou voye fòs sila antre an Ayiti. Selon medya ameriken yo, se 13 peyi manb konsèy Nasyonzini an ki vote pou pèmèt entèvansyon sa fèt tout bon nan peyi a.
Misyon miltinasyonal k ap gen nan tèt li peyi Kenya a pa yon misyon Nasyonzini daprè Rezolisyon 2699 ki sot vote a, l ap gen pou dire yon lane kote responsab yo ap evalye rezilta yo sou 9 mwa. Men tankou anpil peyi te anonse l, plizyè nan yo ap patisipe swa pou bay sòlda menm jan ak Kenya ki pwopoze 1 000 sòlda, oubyen pou bay materyèl.
“Vòt sa se premye etap la, kounya li rete pou n tabli règ angajman yo, yon fason pou konnen kijan fòs yo ap kominike ant yo e jan yo pral travay ak lapolis ayisyen an“, daprè deklarasyon yon responsab ameriken jounal Miami Herald site.
Itali, Espay, Mongoli, Senegal, Beliz, Surinam, Gwatemala, Perou, Jamayik, Bahamas, ak Antigwa-Barbuda se lis peyi sa yo ki te anonse y ap patisipe nan fòs etranjè k ap gen pou vini nan peyi Dayiti. N ap raple konsèy sekirite Nasyonzini an gen 15 manb, se 13 peyi ki vote alòske Larisi ak Lachine te deside pa bay okenn vòt.
Atik sa se pwopriyete prive ©️ Gwoup Medya MAGHAITI 2023
