Direksyon Jeneral Migrasyon (DGM) nan Repiblik Dominikèn fè konnen jodi jedi 6 jiyè a, pou mwa jen an sèlman yo rive depòte 23 881 migran etranje. Pami chif sa yo, responsab yo di yo anrejistre 23 877 ki se migran ayisyen yo depòte voye nan peyi Dayiti, selon Listín Diario.
Avèk nouvo chif sa yo otorite migrasyon yo montre pwosesis depòtasyon prezidan Luis Abinader te pase lòd pou tanmen an pa frennen. Nan sans sa, responsab yo fè kwè 23 881 migran sa yo t ap viv sou teritwa yo a san okenn papye, sa ki fè yo tout te fèmen nan prizon avan yo te deside depòte yo.
Selon detay jounal dominiken an bay, anplis 23 877 migran ayisyen yo te jwenn ki san papye yo, yo jwenn te gen 2 ameriken, yon Ondiryen, ak yon polonè tou.
Pou sa ki gen pou wè ak vil kote yo te tanmen operasyon yo, yo soulinye yo jwenn sitwayen sa yo nan plis pase trèz lokalite pami yo La Altagracia, Elías Pina, Jimani, Barahona elatriye. Konsa tou, Direksyon Jeneral Migrasyon an raple y ap ranpli misyon yo pandan y ap aplike lalwa kont tout migran ilegal, san yo pa fè yo abi.
Atik sa se pwopriyete prive ©️ Gwoup Medya MAGHAITI 2023
