Aprè yon odisyon ki te gen ayè madi 20 jen an nan tribinal federal Miyami an, jij federal Jose Martinez deside pou jijman 10 sispèk kle nan lanmò Jovenel Moïse la fèt nan mwa me 2024. Nan sans sa tou, jij la òdone avoka sispèk yo pou mande pwolonje peryòd tan pou yo prepare pwosè a, selon VOA.
Kontrèman ak jijman Rodolphe Jaar ki te fèt byen rapid nan kòmansman mwa jen an, kote otorite ameriken yo te rive kondane l pou pase rès vi l nan prizon akòz li gen men l tranpe nan touye prezidan Jovenel Moïse, ayè madi a, menm jij sa ki se Jose Martinez voye pwosè lòt 10 sispèk yo pou mwa me 2024 la.
Pandantan sa toujou selon VOA, jij la mande avoka k ap defann 10 akize yo pou antann yo akòz dosye ansasinay ansyen prezidan an tonbe anba lwa Classified Information Procedures Act(CIPA) (Yon lwa ki gen rapò ak sekirite peyi Etazini).
Mete sou kote Rodolphe Jaar ki deja jwenn santans li, li rete kounya Mario Antonio Palacio, Jhon Joël Joseph, James Solages, Joseph Vincent, Christian Emmanuel Sanon, Germán A. Rivera Garcia, Arcangel Pretel Ortiz, Antonio Intriago, Frederick Joseph Bergmann ak Walter Veintemilla.
N ap raple madan ansyen prezidan an, Martine Moïse te deklare nan France24 ayè madi a, verite sou lanmò mari l ap gen pou l blayi yon jou kanmenm. E li te menm soulinye li gen bon jan lide sou asasen ansyen chef leta a, men l te prefere pa site okenn non nan lide pou kite anketè yo fè travay yo pito.
Atik sa se pwopriyete prive ©️ Gwoup Medya MAGHAITI 2023
